ورانلي گونلرين اونوتقانليغي

مئيدانين گيريشينده کيمسه يوخ ايدي. قانشاردا يالنيز باغلي ماغازالارين قاباغيندا ايکي اليني چليگينه سؤيکه‌ييب، هيکل کيمي دايانان بير قوجا کيشي گؤرسه‌نيردي.
گئت- گئده چينارين اطرافي ازدحاملاندي. اوباش‌لارين ضربه‌لري آلتيندا دوشوب قالخان کيشي‌نين آلنيندان قيزيل قان آخيردي. اوباش‌لار اونو چينارين آلتينا چکمک ايسته‌ييرديلر. »او« اوجا سسله يومروغونو قالديراراق نسه دئييردي. جاماعاتين گؤزلرينده قورخو يووا سالميشدي. ماحالين غدار خاني آت اوستونده فاتح بير کوماندان کيمي سينه‌سيني يئله وئريردي. اونون هر »قتله« فرماني‌لا قوجا چينارين يارپاقلاري واراق- واراق واراقلانيردي؛ جاني قورويوردو.
سارا اؤزوندن بئش باش کيچيک اولان قارداشي يحيي‌ني باغرينا باسيب اينله‌ييردي. اوزونون دريسنده قان جيزگي‌لري گؤرونوردو. آنلام سيز سؤزلر دوداغي آلتدا ميزيلداييردي. اطرافينداکي گورونتولر باشقا بير تهر گؤزونه گؤرونوردو. بوغازي تيخانيب زورلا نفس آليردي.
سانکي اوره‌يي کؤکسونونه سيغميردي. آنجاق بونلارا باخماياراق »اونون«ساوالان ووقارلي هيکليني باغرينا باسماق و گوموشو ساچلاريني اوخشاماق ايسته‌ييردي. هاردانسا »اونون« -»داريخما. گئديرم قاييداجام. من وطن اوچون ياشاديم.
وطن اوچون ده اؤلورم« دئديگيني ائشيتدي. »او« سون دفعه اولاراق اوزاقلاردان اؤز گؤرکمي و ووقاري ايله نظاره ائدن آغ ساچلي آنا ساوالانا گؤز دولانديردي. -مآنا سنين ووقاريني و حؤرمتيني قوروياجاغام. مندن نگران قالما!« دئييب، قوجا چيناردان آسيلي قالدي. ساوالان آنا قايغيسي ايله بير اوغلونو دا باغرينا باسدي.
***
زامان ترسينه ايشله‌ييردي. سارا چينارين گؤوده‌سيني باغرينا باسيب دونموشدو. چينارين سينه‌سينده يانيب-سؤنن قيسا و اوزون عؤمورلرين ايزي آيدينجا گوزه چارپيردي. چليگينه سؤيکه‌نيب، هيکل کيمي دايانان قوجا کيشي ساوالانا دوغرو يواش- يواش آدديملاييردي.
دان يئري يئنيجه سؤکولموشدو. بلکه ده گون اورتا يئرينه دوغرو بير قده‌ر ده ياخينلاشميشدي. يحيي ائودن چيخديقدا يئنه ده ساراني، قوجا چيناري باغرينا باسميش حالدا گؤردو. اونا ياخينلاشيب هيجانلا»گينه بوردا نه گزيرسن آخي…!« دئييب، باجيسي‌نين قوللاريندان ياپيشيب قالخيزماغا چاليشدي. سارانين ترپنمگه و دانيشماغا اينجاري قالماميشدي. الدن دوشموشدو. بير گئجه‌ده ساچلاري آغ- آپباغ آغارميشدي.
آلا گؤزلري چوخورا دوشموش، بئلي اييلميش و دانيشماغيني ايتيرميشدي. دوداغي آلتيندا اينيلتي‌يه قاريشميش آنلاشيلماز سؤزلر دئيير، گؤزونو قارداشي‌نين گؤزلرينه زيلله‌ميشدي. يحيي سارانين بو دوروموندان قورخويا دوشدو.
قورخونج بير حالدا »نييه منه بو تهر باخيرسان قادان آليم؟« دئيه‌رک، سارانين قوللارينا گيريب، آياغا قالخيزدي. »قوربانين اولوم باجي. آخي نييه مندن خبرسيز گينه ده ائودن چيخميسان؟»دئيه‌رک، ساراني ائولرينه ساري چکدي. سارانين ال ديمه‌ميش ياتاغي اونون اينجارسيز هئيکليني اؤزونه آلدي. يحيي باجيسي‌نين باشي اوستونده اوتوروب اونا گؤز تيکدي.
سارا گؤزلريني ياري آچيب، بوياسيز بير تبسم‌له »آتام سؤز وئردي بو گئجه بيزه قوناق گله‌جک» دئييب، يئنه ده گؤزلريني يوموب، هاراسا غرق اولدو. يحيي‌نين بوغازيندا دوگونلميش قهر بيردن آچيليب، هؤنکورتويه چئوريلدي.
سارانين اينجارسيز هئيکليني قوللاري آراسينا آليب، آتاسي کيمي اونون پريشان ساچلاريني اوخشاماغا باشلادي. او هميشه آتاسينا اوخشاماغا چاليشيردي. او اؤزونو آتاسي‌نين داوامي کيمي حساب ائديردي. اونون يئريشيني، دوروشونو، دانيشماسيني تکرار ائديب، باجيسي‌نين دونياسيندا بوش قالان آتا يئريني دولدورماغا چاليشيردي.
***
پاييزين سون گونلري ايدي. گؤيون اوزو قارالميشدي.
هاوا زهرلي ايلان کيمي آدامين صيفتيني چاليردي. گاهدان بير شيمشک گؤز قيرپيميندا قيوريليب، گويده ايز چکيب، سونسوزلوغادوغرو سوزوردو. شهرين آنا مئيدانيندا قوجا چينارين قوروموش جاني تيتره‌ييردي. داها هميشه‌کي کيمي بوداغلاريندان قوشلار اوچموردو.
گئجه‌دن شيديرغي باشلايان ياغيش تورپاغين ياناقلاريني قامچيلاميشدي. ياغيشين يئريني، آستاجا ياغان قار آلميشدي.
بوگون آذر آيي‌نين 21 ايدي. حؤکومت هر ايل بو گونده شهرين آنا مئيدانيندا طنطنه‌لي ميتينگ کئچيريردي؛ غلبه مارشي چالينير، مئيداندا مامورلار، ژاندارما دسته‌لري رژه کئچير، قارا ياخا مامورلارين اليندن نفس آلماق مومکون اولموردو. بو گون ده آنا مئيدان و اونون اطرافي قالاباليق‌ايدي. هر طرفده ظفر مارشي‌ چالينيرو هورا سس‌لري ائشيديليردي.
يحيي يوخودان آييليب اوز- گؤزونه ال گزديريب، ساچلاريني ترتيبه سالدي. سونرا لاپ تازا و ياراشيقلي پالتاريني گئييب، آتاسيندان يادگار قالميش پالتونو اينينه چکيب، ائودن چيخدي. بورکونو قولاقلاري‌نين آلتينا قده‌ر چکدي. آتاسي‌نين پالتووندا اؤزونو چوخ متين و قيوراق حيس ائديردي. پالتونون ساغ جيبينده آغيرليق ائدن شئيي يوخلادي. دريندن بير کؤکس اؤتوردو.
آدديملاريني ايتي آتاراق، گؤزلريني ياغان قاردان قوروماغا چاليشدي. بير آن دا اولسون چينار آغاجي، اونون آنا بوداغيندان آسيلان گوموش ساچلي قهرمان آتاسي و سارانين سولغون باخيشلاريني اونودا بيلميردي. اوره‌يينده تالانميش بير ائلين، قانا چکيلميش بير تورپاغين هارايي شعله‌لنيردي.
شهرين مئيدانينا چکيلن و هميشه سونسوز گؤرونن کوچه‌نين انتهاسينا ياخينلاشدي. ميداندا قوجا چينارين اطرافينا توپلاشان ژاندارمالاري، شهرين اوباش‌لاريني و بزکلي قوماشا بورونموش بير سککي اوستونده قورولموش تريبون آرخاسيندا حرارتله دانيشان ژاندارما باشچيسيني گؤردو. دانيشانين کناريندا »ارشه« ماحالي‌نين غدار خاني سينه‌سيني قاباغا وئريب، فاتح کيمي دايانميشدي.
يحيي نئچه آدديم ايره‌لي‌له‌ييب، يئني‌دن پالتونون ساغ جيبينده‌کيني يوخلادي. گؤزلريني بير قوجا چينارا، بيرده اوزاقدان ساچلاري پارلاق گؤرونن آنا ساوالانا تيکدي. اليني ساغ جيبينه آپاريب، سيلاحين دسته‌سيني سيخدي…سون