من او ساعاتدان اؤلولره قوشولدوم

داوا- درمان، او دوکتور بو دوکتور کار وئرميردي. مرداد آيي‌نين اون‌بئشينده اون گون ده خسته‌خانادا قالديم. اونون دا فايداسي اولمادي. هر هانسي دوکتور گؤروردو، دئييردي:
– قوجاليقداندي. اليميزدن ائله بير ايش گلمز. آپارين، ائوده استراحت ائله‌سين!
ياواش- ياواش اوشاقلاريم دا اليمدن بئزيرديلر. اوغلوما هر واخت زنگ ووروردوق دئييردي:
– بو گئجه نگهبانام؛ صاباحدان دا ماموريته گئده جم؛ گله بيلمه‌رم.
قيزيم اؤزو بيزدن قاباق زنگ وورور، دئييردي:
– آنا، واللاه اوشاقلاري تک قويا بيلميرم. فرهادين دا ايت اخلاقي وار. او اوشاقدان دا پيسدي. سحر- آخشام گؤز ياشي تؤکورم. اوره‌ييم اوردادي، آمما اؤز اليمده دئييل، گله بيلميرم.
تک اللي آروادين دا منيم جنازه‌مه گوجو چاتميردي. اونون دا آللاهيندان ايدي من اؤلم، بو وضعيتدن ياخاسي قورتولا. ميراث اؤلوم ده گونده بير دفه منه باش ووروردو؛ قونشولار تؤکولوب، مني اوزاديردي‌لار قيبله‌يه طرف. اوچ- دؤرد ساعات معطل اولوردولار. نه اؤله بيليرديم، نه ده فره‌صاتلي ديريله بيليرديم. قونشولار مايوس اولوب، دئييرديلر:
– بوندان اؤلن چيخماز؛ دورون گئده‌ک!
اورژانس نومره‌ميزي تانيميشدي. داها بيزيم تئلفون زنگيميزه هاي وئرمير، چاغريشيميزا گلميردي. حقيقتن، اؤز اليمده قالميشديم. گئجه- گوندور فيکيرلشيرديم: »گؤره‌سن من اؤلندن سونرا نئجه اولاجاق؟!«
بوگون آخشام اوغلوم نگهبان دئييلدي. ماموريته ده گئتمه‌ميشدي. ساغ اولسون؛ گليب، منيم قول- قيچيما بير آز ماساژ وئردي، بارماقلاريمي اوغدو، تورمالادي، ننه‌سي چؤره‌ک‌خانادان قاييتماميش دا، چيخيب گئتدي. او گئدندن اون ديقه سونرا من بيردن بيره چوخ راحاتجاسينا اؤلدوم؛ روحوم بدندن چيخدي. چوخ يونگولشميشديم گؤيده اوچوردوم. پنجره‌دن ائشييه چيخديم؛ کوچه‌يه بير گؤز دولانديرديم؛ آرواديم الينده سنگک، قونشونون کيشيسي ايله خيمير- خيمير دانيشا- دانيشا گليردي. چوخ تعجوب ائله‌ديم. آخي، او هر زامان او کيشيني پيسله‌ييردي؛ ايندي ائله بيل بيرجوت قوزو کيمي دولانيرديلار. تئز ائوه قاييتديم. چوخ ماراقلي‌ايديم آرواديم منيم اؤلمه‌ديگيمي بيلندن سونرا نئيله‌يه‌جک؟! امينم اليني قولاغينا قويوب، ائله قيشقيراجاق، هارايينا قونشولار تؤکوله‌جک؛ ائله قيشيقراجاق ائو تيتره‌يه‌جک. سؤزون دوزون آختارسانيز، بتر تعجوبلو ايديم. ائله دوشونوردوم کي، من اؤلندن سونرا يئر کوره‌سي کُنْ فَيَکُونُ اولاجاق؛ ائوده دؤرد دوواردان توتموش، آينا- شمعداناجا ياس توتاجاقلار؛ هئچ اولماسا آرواد اوچ دؤرد دفعه هوشدان گئده‌جک؛ کوچه قاپيسينا قارا علم آساجاقلار؛ قاپي- قونشو قارا گئيه‌جک؛ قيزيم، آرواديم، باجي‌لاريم اوز- گؤزلريني جيريب، داغيداجاق‌لار. هئچ بيلميرديم بو ايشلرين منه بير خئيري وار يا يوخ؟!
بو فيکرده ايکن، قالخيب اوتوردوم پذيرايي‌نين پرده‌سي‌نين شيشي‌نين قيراغيندا. ائوين هرطرفيني ياخشي گؤرمک ايسته‌ييرديم. بير او قده‌ر چکمه‌دي آرواديم قاپي‌يا آچار ساليب، ايچه‌ري گيردي. جنازه‌مه باخمادان روسري سيني گؤتوردو، مانتوسونو چيخاريب آسدي ايشقابا. سونرا آشپازخانايا گئديب، آلديغي چوره‌گي قيرميزي قايچيميزلا کسيب، بوکوب قويدو فريزر موشامباسينا؛ اونلاري دا قويدو فريزره. اؤز- اؤزومه دئييرديم: »تئز اول باخ منه! من اؤلموشم. سونرا، هيجانيم داها دا شدتله‌نيردي، آمما اونون عئينينه ده دئييلدي. او اؤز ايشينده ايدي. اوجاق‌گازين آلتيني يانديردي؛ چايداني شيردن دولدوروب، قويدو گازين اوستونه. تله‌سيرديم؛ باغريم چاتلاييردي. ديري اولسايديم، يقين بو هيجاندان سکته ائديب، اؤلرديم. گئتديم آشپازخانايا. بير عؤمور حيات سوردويوم آدام، منيم اؤلدوگومو بيلندن سونرا نه ائده‌جه‌گيني بيلمک ايسته‌ييرديم.
ائله کي چاي دم آلدي، آرواديم عادت اوزره اؤزونه بير دولو ليوان رنگسيز چاي بوشالتدي. گئنه ده عادت اوزره سسلندي:
– عاباسقولو، چاي ايچيرسن؟
اوپن‌ين اوستوندن باخيرديم جنازه‌مه. من ائله اؤلمه‌ميشديم کي سسيم چيخسين. آرواد يئني‌دن سسلندي:
– عاباسقولو بسدي دا، نه قده‌ر ياتاجاقسان؟! دور بير چاي ايچ!
منيم جينقيريم دا چيخمادي. آرواديم عادت اوزره مني سايمادي. بوشالتديغي چايي آستا- آستا ايچدي. آز قاليردي اؤدوم داغيلسين. بابا من اؤلموشم با! آرواديم يئني‌دن بير ده سوروشدو:
– عاباسقولو چاي ايچيرسن؟
Arazazarbaijzn.anadilimiz@gmail.com