لاله اَشکيه
آناديليميز: بو اثر خيال و خاطيره، تبريز حسرتي و اينتيظار برزخي آراسيندا، آيهانين نيسگيل حيکايهسيدير. حيسلري گوجلو و گرچک ياشايان و ياشادان آيهان، خستهخانا ياتاغيندا اؤزو، گودوکچوسو و کؤلگهسي و اطرافيندا اوتاق، دووارلار، پنجره، لامپا، پيللهلر، باشماق، تئلفون، تاوان و جانلي جانسيز اَشياء هر نه وارسا روحلارينا توخونوب هر ذرهلري ايله دانيشيب، اونلاري ديله گتيرير. وارليغي ايله اوخشايير و آنلام قاتير هاميسينين وارليقلارينا و يوخلوغو ايله درين بوشلوقلاردان، داها درين آنلاملارا چاتديرير: »وارليغي و يوخلوغو، خيالي و خاطيرهني.«
خستهخانا ياتاغيندا هر آخشام ساعات ضربهلري ايله اورهک دؤيونتوسو بير-بيرينه قاريشيب باشي اوستونده اؤلومجول بير حسرت مارشي چالارکن، او آيينجار-آيينجار سسلهين نفسلرينين ماهنيسي ايله جانسيز اَشياني اؤزگورجه ياشام رقصينه آياغا قالديريب، درد هاواسينا آجي-آجي اويناديب، ظاليم تقديره گولومسهيهرک اَزَليَّتـدن اَبديَّته قدهر اؤزو اؤلسه بئله، هئچ اؤلمهين عشقي ايله اؤلومه مئيدان اوخويور. و بئلهجه اؤلومدن اؤنجهکي متنده سسلر چوخ قاپالي و حبس ائديجي فورمادا گؤرونور، اَشيا و مکانلار بولانتيلي، آغير يورقان، قالين پرده، دانيشمايان دووارلار، سؤنوک لامپا و دوققوز کي زامانين بيتمک اوزره اولدوغونون خبريني وئرير، آما اؤلومدن سونرا هر نه دهييشير، يورقانين آغيرليغي چکيلير، پرده آچيلير، پنجرهدن ايشيق دوشور، دؤرد ساييسي، دؤرد يؤنون آزادليغيني يادا سالير و روح اوچور…
بو ايکي فاز آراسيندا متن هر زامان بوتون فورماسيني قورويور، آما آرايهلرين معناسي دهييشير، قاپاليقدان آچيلماغا، حبسدن آزادليغا، وارليقدان يوخلوغا و يوخلوقدا داها عئيني وار اولماغا کئچيد وورور.
سورئاليست ياناشما، متنده تکرار اولان موتيفلرده، بورکولموش زامان-مکان گؤرونوشلرده و بير داييمي نيگرانليق اورتاسيندا گرچکلَشن حضور ايله آشکارلانير. پيسکولوژي تفسير اونو گؤرسهدير کي اثرين بؤيوک قيسمي ياتاقدا کسيلن باخيشلاردان و يارالي بيلينجين گيزلي قاتلاريندان قايناقلانير. اؤلوم ماجراسي، يالقيزليق حيسّي، کيمليگين پارچالانما دوشونجهسي و سسين گلمهمک قورخوسو، يازارين جومله قورولوشو و ديالوقلاريندا بير نئچه پارالل تاکتيک اولاراق گئت-گئده بؤيويور و اثري قانادلانديرير.بو اثر هر هانسي بير لوژيک آنلامي حقيقته باغلاماقدان قاچيناراق، اوخوجونون اؤز شعورو ايله اثر د?نياسي آراسيندا کؤرپو قوروب آزادجا دويغولار و دوشونجهلرين حرکت ائتمهسينه ايمکان وئرير.بئکئتين اثرلري کيمي، بو اثري داها ياخشي آنلاماق اوچون سورئاليست و پيسکولوژي، بلکه ده ابزورد اوخونوش متندهکي رمز و ايمالاري آچماق اوچون ان اويغون ياناشماقدير.
عزيز قارداشيم آيهان ميانالييـا ميننتدارام بيرينجيسي، خستهخانا دا هر اينسانين دينجَلمک اوچون ياتديغيندا، بئله بير اثري يازيب ياراديب، آجيلارينا ياراديش آجيلاريني قاتماق اوچون و ايکينجيسي هر زامان کيمي اثريني اليمه چاتديريب منه بو اوخونوش لذتيني ياشاتديغي اوچون.
Arazazarbaijzn.anadilimiz@gmail.com


دانشجویان در ساخت آینده آذربایجان غربی نقشآفرینی کنند
رودخانه سردرآباد بوکان احیا شد؛ آغاز رهاسازی بچه ماهی در سد خراسانه
آذربايجانغربي بايد به استاني صنعتي و اشتغال آفرين تبديل شود
جهش اقتصادي آذربايجانغربي؛ از جذب کامل سهميه پيلهوري تا رشد 23 درصدي مجوزهاي صنعتي
وسعت درياچه اروميه در 2 هفته 20 کيلومتر مربع افزايش يافت
استاندار نبايد در انتخاب شهردار دخالت کند
ايران چهارمين اقتصاد فلاکتزده جهان
انسجام و همبستگي مردم از مؤلفههاي اقتدار کشور است
ترميم مزد در بنبست سياستهاي اقتصادي دولت
وقتي شريانهاي ترانزيتي آذربايجانغربي قرباني خودتحريمي ميشوند
