هاوا چوخدان ايدي قارالميشدي

او اويونلارين يانيندا اَن چوخ سئوديييميز اويون »ديغيل دوو« ايدي. آسفالتا حسرت قالان کوچه‌ميزده يئددي-سگگيز ائو وار ايدي. اون يولداش ايديک و اونوموزون دا ديغيل دووو وار ايدي. يولداشلاريمين ايچينده بايرام ايله‌هاميدان چوخ صميمي‌ايديم.
آتا-آنالاريميز قويسايديلار گئجه‌ني ده کوچه‌ده ديغيل دوولاريميزلا اوينايارديق. ديغيل دوو بيزه تکجه چرخين بير تکري دئييل‌دي؛ او، بيزيم دونياميز ايدي.
گون‌لرين بيرينده، يئنه ديغيل دوو ياريشي قويموشدوق. مسابقه گونو، اورک‌لريميز سينه‌ميزدن ائشييه آتيلماق ايسته‌ييردي، ائله دؤيونوردو کي آز قاليردي سينه‌ميز پارتلاسين.‌هامي‌بير الي‌له ديغيل دووونو بير الي‌له ده ديغيل دوو دولانديران آغاجيني ساخلاميشدي. يوسوفون فيت چالاماسي‌لا هئچ نه‌يي گؤرموردوک. بيز ايديک و ديغيل دوولاريميز و قاباغيميزا قاتديغيميز يول.
هردن بيريميز قاباغا کئچيرديک، گاهدان دا ائله بير-بيريميزه سورتولوردوک کي، آز قاليردي باشي اوسته يئره گليب مسابقه‌دن دالي قالاق. آنجاق مسابقه‌دن چيخماغي هئچ بيريميز تصور بئله ائده بيلميرديک. بونو مسابقه باشلاناندا گؤزلريميزدن ده اوخوماق اولاردي. آرتيق سون 10 مئتيره ياخينلاشيرديق.
من، بايرام بير ده قولو بيرينجي اولماغا گئديرديک. بير ده گؤزومو اونلارا ساري بورانا اونلار مني کئچديلر، قاباغيما باخانا بايرام اول اولدو. سونرا دالدا قالانلار يئتيشدي و‌هامي‌يئره سره‌لندي.
هوشوموز باشيميزا گلندن سونرا، مسابقه‌دن قاباق ييغديغيميز پول‌لارلا، بايراما کئيک-کانادار (نوشابه) آلديق. او آستا-آستا کئيکي موشامباسيندان چيخارتدي و کاناداري قورتوم-قورتوم اون‌سککيز گؤزون حسرت‌دولو باخيش‌لاري آلتيندا باشينا چکدي.
اوست-باشيميز بوتون توز-تورپاق اولوب آلنيميزدان تر سوزوردو. آنجاق، ديغيل دوو سورمک‌دن دويماياراق يئنه اويناماقدان ال چکه بيلمه‌ييرديک. يئنه و يئنه و يئنه اويناديق. گون باتيب، آي گلميشدي. اوزاقدان بير کيشي بيزه ساري گليردي. بيزه ياخينلاشاندا آتام‌دير گؤردوم. گؤزلري باشينا ديرماشميشدي. ال‌-قولون اؤلچه-اؤلچه بيزه ياخينلاشيردي.
بيزه يئتيشيب: «ائششه‌يين بالاسي بيليرسن ساعات نئچه‌دي؟ نه زامان او خارابانا گله‌جک‌سن؟ گل جهنم اول گؤروم!» دئييب، بيردن‌بيره قولاغيمين ديبين قيزارتدي. سونرا دا، قولومدان ياپيشيب سوروتله‌يه-سوروتله‌يه، ائوه سارى آپاردي. بير اليم ايله ديغيل دووومدان ياپيشيمشديم. ياري يولدا، آتام دئيينرکن، بير منه باخدي، بير ده ديغيل دووا. بو باخماق منه داها چوخ اضطراب وئردي.
اولمايا؟! مين بير فيکير-خيال بير آن‌دا ذهنيمدن کئچدي‌‌. منيم فيکيرلشمه‌ييمه آمان وئرمه‌ين آتام ديغيل دووو اليمدن آلدي و گوجو وارکن اوزاقلارا تولازلادي. روحوم بدنيمدن آيريلدي سانديم. باغيريم قان اولدو. دونيا باشيما فيرلاندي آما قورخودان هئچ نه دئيه بيلمه‌ديم. ائوه کيمي‌گؤز ياشلاريم سئله دؤندو.
ائوده، شام يئمه‌ميش اوتاق‌دا حبس ائتديم اؤزومو. مين بير غم-غصه ايله گئجه‌ني گوندوزه باغلاديم. سحرچاغي آتام ايشه گئدن‌دن سونرا اويناديغيميز يئره گئديب، هر يئري آختارديم آنجاق ديغيل دوومو سو اولوب يئره گيرميشدي. کور-پئشمان، ائوه سارى قاييتديم.
يول‌دا اوشاقلار اويناماق اوچون مني ده چاغيرديلار. جاواب‌لارين وئره بيلمه‌ديم‌. ديل-دوداغيم قوروموشدو و آرتيق بير اؤلويه دؤنموشدوم. ديليم ده باغلانميشدي. اوره‌ييم ائله دولموشدو کي.
ائوده، آنام نه قدر ديله توتسا دا، بير کلمه بئله دانيشماديم. اوتاغا گئديب، ديزلريمى قوجاقلاييب، سس‌سيزجه آغلامايا باشلاديم. اورييم پارتلاماق ايسته‌ييرى. بيلميرديم نه ائدم. او گوندن، گئجه- گوندوزوم ال‌دن گئتميشدي. دونيا‌دا ياشاماق ايسته‌مه‌ييرديم، نه دانيشماق، نه اويناماق، نه يئمک نه ده ياشاماق.
ايکي گون بئله‌جه ساووشوب بيتدي. اوچونجو گون، آنام يئنه ده اوتاغيما گلدي. يان-يانا قوشدوغو محبت‌لي جمله‌لرله مني ديله توتماق اوووندورماق ايسته‌ييردي يئنه ده. نئچه دقيقه آنامي‌دينله‌يندن سونرا بيردن-بيره بوغازيم دئشيلدي و سس‌سيزجه باغيرديغيم سؤزلر ياش اولوب گؤزلريمدن آخماغا باشلادي. آنام باغرينا باسدي و هئچ زاد دئمه‌دن خئيلاق آغلاشديق.
بير نئچه دقيقه‌دن سونرا، اوره‌ييم بوشالدي و ديله گلديم: »آنا، ديغيل دوووم! من ديغيل دووومو ايستيرم.« -دئديم. آنام باشيمي‌تومارلادي »اولسون اوغلوم، نييه داريخيسان؟
بير دنه آيريسيني تاپاريق دا…«-دئيه، اوره‌ييمي‌يوموشالتمايا چاليشدي.
آرتيق، اون گون ايدي ديغيل دووومو ايتيرميشديم. بو اون گونون ايچينده دفعه‌لرله، يولداشلاريم، قاپيميزا گلسه‌لر بئله‌، گئديب اويناماغا کؤنول وئره بيلميرديم.
او دهشتلي گوندن اون‌ بيرينجي گون کئچميشدي و اوره‌ييم چوخ داريخيردي. گون اورتا ايدى. حه‌يه‌ط‌ده اوتوروب جوجه‌لريمه دن وئريرديم. بيردن قاپينين ايشگيلي آچيلدي. آتام ايچري‌يه کئچدي. آياغا قالخيب سالام وئرديم. منه ساري گليب دئدي:
- يولداشلارين چاغيرير!
قاپي‌يا ساري گئتديم. قاپي‌ني آچان همن دوققوز نفر يان-‌يانا دوزولموش دوستومو گؤردوم. اؤن‌لرينده ده بير ديغيل دوو وار ايدي.
آتام ائشييه چيخدي: گؤتور او دا سنين ديغيل دووون! دئدي و گؤزلرين منه تيکدي.‌هاي-کوي و ياشاسين سسي گؤيه قالخدي. مات قالميشديم. اينانا بيلميرديم. بايرام ديغيل دووو گؤتوروب منه ساري اوزاتدي.
آتام: »گون باتماميش گلين‌ها!« دئدي و قاپيني اؤرتدو.
هاميميز بيردن، مسابقه مئيدانينا ساري قاچديق مين بير عشق ايله. آرخاميزجا دومان قالخميشدي. آرتيق دونيا منيم ايدي. ياشاماغي يئني‌دن دوشونوردوم. هر کس اؤز ديغيل دووونو ديغيللاديردي. هئچ بيلمه‌ديک نه زامان مئيدانا يئتيشديک. خط‌لري چکديک. باشلانيش و سون نقطه‌سيني بللي ائتديک و مسابقه‌نين باشلاماسيني گؤزله‌ديک.او گون، اون دفعه دالبادال مسابقه وئرديک.‌هاوا چوخدان ايدي قارالميشدي و بيز هله ده اويناييرديق.
Arazazarbaijzn.anadilimiz@gmail.com