بوراسي شهرين آشاغاسينين قيراغيدير
بوراسي شهرين آشاغاسينين قيراغيدير
پوراکبر
بيراينجي بولوم
آناديليميز: سيسقا ياغيش ياغاري بشينجي گئجه‌يه قووشور، گونوزو اوستونده، يورولمادان. هردن بير قيساجا آرا وئريب تؤشکون درير قاچارلار تک، يورغا قاچير.
سانکي قيش دئييل باهار و يا پاييز آيلاري‌نين ايلکي‌دير، آمما ايچينده هردن بير قار گيله‌سي قيش آيي‌نين اولماسينا بلگه‌دير، سويوق، چيله سويوغو تکجه يانديريجي دئييل. بولودلار آي ايشيغينين يئره يئتمه‌سيني نه قدر اؤنله‌سده، او اؤز شفق‌لرين آغ بولودلارين آراسينا سوخاراق بَياز پانبيغ‌لي بير سما يارادير.بو بياز سمانين آلتيندا گئنيش گؤزه‌ل خياوانلاريلا پالچيغلي کوچه‌لريله، عرشه قوزانميش بينالاريلا چيي کرپيجدن تيکيلميش دام‌لاريلا، صفالي پارک‌لاريلا، کرخانالارين توستوسو دولو محلله‌لريله، روشوته غارته دايانان خائين اللرين آوروپا ياغماکار اللرنن بيرلييي ايله، چوخونلوقدا اولان ياراديجي و امک صاحيب‌لريله، بؤيوک بير شهر دايانيب.
بوراسي شهرين آشاغاسينين قيراغيدير .
بوراسي اؤز‌هاواسيلا، داشيلا، تورپاغيلا، ائولريله، پالچيغلي دار کوچه‌لري ايله، آداملاريلا… شهرين آشاغي‌سي‌دير. آشاغي‌سينين آشاغي‌سي. چيي کرپيجدن هؤرولموش داملار، بير بيري‌نين قارنينا گيررک نيظاملي نيظامسيز اَيري مويري کوچه‌لرين کنارينده رنگلي- رنگسيز قاپيلاريني دوزمکده‌ديرلر. سوبا برولاري دامين، دوارلارين ده‌لييندن بوغازلارين گؤيه آچاراق توستولرين‌هاوايا هووخوروب جانلاريندان چيخان ايستي‌له ائوده‌کيلره شيرين يوخو اورتامي‌ياراتماقداديرلار. بوراسي اوزاقدان باخان گؤزلر اوچون، بوخارلاشماقدا اولان تيترک بير گؤرونتو سرگيليير. بوردا ياشايان اينسانلار شهرين يوخاري باشيندا ياشايان آغالاردان بام باشقا بير ياشام سورورلر. بورادا آخشام سحره دک طمطراقلي قوناقليقلاردان، دانس مجليسلريندن بير اثر يوخ. اونلار شهرين يوخاريسيندا اولان کابارالاردا، رستوران‌لاردا، زرق- برقلي آپارتمانلاريندا يئييب ايچيب اويناياراق گئجه‌ني صبحه قووشدوروب، گونوزلر شيرين يوخو قوينونا گيررلر، بونلار ايسه کرخانالارين جان آليجي قييناغيندان رخصت اَلده ائدرک، ائرته‌دن کَپرَم آلتيندا يورقونلوقلارين دَره رَک سَحَر تئزدن کرخانانين امانتين يئني‌دن الينه تاپشيرارلار.
آمما نه ايسه بير نئچه آيدان بَري شهرين يوخاريسي اومودسوزلوغا اوغراميش آشاغيداکي‌لارين ايسه اوره‌ک‌لرينده اومود چيراغي يانيب، اوجاقلاري قالانيب.
– سيرفاني گؤتوردون اوردان؟ اونودارسان سَحره کيمي‌دامجي چوره‌يين‌هاميسين پايمال ائدر‌ها…اولماسا بير قاب قويايدين دامجينين التينا…پولاد يورقانين آلتيندان باشين چيخارديب فريده‌يه دئدي.فريده بير آنليغا سيرفاني خاطيرلاييب بير از شوبهه ائدرک يادينا چؤره‌ک سيرفاسي‌نين يئريني سهمانلاديغي دوشوب يورقاني چنه‌سينين آلتينا قده‌ر ائنديريب دئدي:
– آرخايين اول… قاب قاليب کي…
پولاد ياتديغي يئرده ائوين قارانليغيندا باشين توولايب
– تاري‌نين کرمينه شوکور …آخي قيشدادا بو قده‌ر ياغيش اولار؟ دئدي.
اوچ گوندو‌هاوالار ياغشلي کئچديييندن داملار يئترينجه ايسلانيب، دامين ديره‌ک‌لري آراسيندان دامجيلاماغا باشلاميشدي. فريده تکجه اوتاغلاريندا هر دامجينين آلتينا بير کاسا بوشقاب قوياراق ائوده‌کي دؤشه‌نه‌جيين ايسلانماسينين قاباغين آليردي.پولاد ائوين قارانليغي سکوتونده فيکره دالميشدي. بو سکوت محض بير سکوت دئييلدي، چونکي هر دامجينين نوبت‌له اؤز قابينا دوشمه‌سي ائوه حاکيم اولان سکوتو‌هارمونيک بير شکيلده پوزوردو. بونا باخمياراق کوچه‌دن کئچن آوارا ايتلرينده هر دَن بير هوروشو بو پوزقونلوغو داها دا آرتيريردي.
– گرک فرهادا دئييم صاباح …
– صاباح فرهادا تاپشير دامي‌ياخشيجاسينا آياقلاسين. فريده‌ني خيطاب ائدرک دئدي.
فريده دن بير جاواب چيخمادي.
– بلکه ده يوخلاميش، اؤزونه دئدي.
گؤزلرين يومدو، يورقوندو يوخلاماق ايستيردي. بو يورقونلوق فابريکا ايشيندَن دولائي دئييل، بلکه ده اعتصابلاردان شعارلار وئرمه‌دن، اوزون موددت خياوانلاردا يول يئريمکدن دولايي ايدي. کئچن گونون ماجرالاري، اعتصاب‌لار سوره‌جينده ائشيديب اؤيرنديکلري، بئيني‌ني فيرتينالار عالمينه چئويررک يوخويا ميدان سولاييرديلار. پولاد دؤرد آيدي فابريکا اَمکداشلاريلا ايشدن اَل چکرک اعتصابلارا، گؤستري‌لره قوشولموشلار. بو موددت ده او چوخ شئي‌لر اؤيرنميشدي. هر گئجه ياتارکن يئرين ايچينده اؤيرنديکلري گؤردوکلري بارده دَرينجه‌سينه فيکيرلشيب اونلاري اؤزو اؤزونه قاوراييردي، قاورارکن يوخلاييردي. آمما بو گئجه بام باشقا، سانکي بو ايشين سونونا وارماقدا ايدي. اونا گوره، بعضاً زامان آنلامين ايتيريب حاديثه‌لر زامانا اييلمييه‌رک بيربيري‌نين آرديندان اوز وئريب، بعضاً ده دامجي‌لارين هر آهنگي بير حاديثه‌ني تمثيل ائديردي….– دوستلار داها او زامان کئچيب…هر ايشچي اَن آزي آلتي يئددي کيلاس ساوادا ماليک‌دير گؤردويو شئيي اؤزونه گوره ياخشي درک ائدير بيزيم خيال‌نان زادنان ايشيميز يوخدو. “مَمي‌موتور” دئدي.هامي‌اَل چالدي.
حسن مَرَددي دئدي:– اون بئش ايلدي جان وئريرم هله بير دام صاحيبي اولماميشام، يئنه ده ايجاره‌نيشينم، اودا‌هاردا؟ شهرين خارابالاريندا، “آقاي ميلاني” همشه قول وئريب! آقاي ميلاني، بير ساعات ايشه بئواخت گلسم قيرانينا کيمي‌حقوقومدان چيخيرسان، چوخدا دانيشسام قولاغيمدان توتوب ائشييه آتيرسان….ايشچي لر هر طرفدن – اؤز تخصيريميزدي … باييث اؤزوموزو…مرگ بر ميلاني… دئديلر.صمد سيبيل:– دوستلار فيکريميزي ساپتيرماييب تقصيرلري بوينوموزا يغماياق، نه “ميلاني” ده تقصير وار نه بيزده، ميلاني‌لر اربابلارين يالنيز بير عاميلي، قولدورلاري‌ديرلار، بو شاه رژيمي‌دير کي بيزي هر شئي‌دن محروم ائديب، نييه تاجيرلر “اتحاديه‌ي بازاريان”، ” انجمن بازاريان” آ ماليک‌ديرلر، آمما بيزلردن دؤرد نفر بير يئره توپلاشاندا اولوروق “خرابکار”، يوخ قارداشلار اصيل دوشماني تانيياق، او شاه رژيمي‌و اونون خاريجي ارباب‌لاري‌دير…
هامي‌بيرليک ده:
مرگ بر شاه…مرگ بر شاه….
دامجي‌لار بير عسگري موزيک دسته‌سينين طبلي تک پولادين بئينين‌دن قالخان شعارلاري موشايعت ائديرديلر. پولاد بير آنليغا اؤزون دامجي‌لار عالمينه تاپشيردي. دام… دووم…چاک..
چوک. هر بيريندن آيري آيري سسلر ياييليردي آمما سسلرينه باخمياراق اونلارين هر بيري بير قييق تک جانينا باتيردي. تکجه اوغلو فرهاد يادينا دوشدو.– اوستونه داميب يورقانين ايسلاتمييا…صاباح يولداشلاريندان يارديم آلاراق دامي‌ياخشي آياقلاماسي لازيم….وضع گئتديکجه خارابلاشير…گاردلاردا وحشيجه‌سينه گولله ياغديريرلار، فرهاد خياوانا چيخماسا ياخشيدي…
Arazazarbaijzn.anadilimiz@gmail.com
تاریخ:
1403/06/17 09:58 ق.ظ
|
دفعات بازدید: 65 |
چاپ
آزادی ۶۰۰ نفر زندانی در آذربایجان غربی
درباره آراز آذربایجان