من بئله دوشونمه‌ميشديم

گؤروش لذتينين ياغي داماغينا سوواشسادا حسرتين آجيسي اونا غاليب گليردي. يئيين و بؤيوک آدديملار آتاراق هئي دؤنوب داليسينا باخيردي. نه‌لردنسه کيم‌لردنسه قاچيردي سانکي. بلکه ده اؤزوندن!– تئز قاييت، بوگون ايشي کسمه‌لي‌ييک. صاباح خوروز بانلاماميش ميرزه قادير کسه‌جئح قاپيني. دئميشدي آناسي ائودن چيخينجا.گئجيکدييينه گؤره عاغيلا باتان سبب‌لر دوشونمک ايسته‌ييردي آناسيني قانديرماغا آما بيلال و اونون سون باخيشي گؤروش موناسيبتيله بئينينده کانسئرت قويموشدو ائله کي باشقا فيکرلري دويماغا ايمکان وئرميردي. بيلالي مکتبدن سئويردي و اونون اولاجاغينا سؤز وئرميشدي، بونا گؤره ده بوتون ائلچي‌لريني او جومله‌دن ميرزه قاديرين شهر گؤرموش موهنديس اوغلو شاهيني رد ائله‌ميشدي.
بيلال کندين تميز و دوشونجه‌لي جوانلاريندان بيري ايدي آنجاق ساغ قيچينداکي آنادان اولما عاريضه‌يه گؤره آناسي “چولاق‌لار دا منيم قيزيما قاليب”؟ دئيه اونونلا ائولنمه‌سينه راضي اولموردو.– کئچن ايل او بئله اؤزومو اؤلدوردوم گئجه گونوز درسه باخديم، مين اويوندان چيخيب قويمادين گئديب تبريزده کنکور وئرم بو ايل گئنه يازيليب هارداندي گئده‌جييم.
صاباح دا گولزارا باش ووروب اوندان لازيم اولان کيتابلاري آلاجييام. آبيرين گئدير گئتسين قالير قالسين.بونلاري يئرله گئدن قاش قاباغينا باخماييب آناسينا دئميشدي کئچن گئجه. بيلالا دئيه‌جک سؤزلريني ده بير داها فيکريندن کئچيرديب ياتاغين سرين قوجاغيندا بوزوشموشدو.ائولرين بيرينين سوواق دووارينا دايانيلان ساپي چيرک باسميش بير بئل‌‌‌ه ساتاشدي گؤزو. يولونون ياريدان چوخو قالسادا بيردن حرکتدن دوردو. فيکري هارالاراسا گئتدي.
ايکي دؤور اؤز باشينا دولانيب فيليم چکر کيمي بوتون اطرافي ديققتله گؤزدن کئچيرتدي. خوليالي‌لارا بنزه‌ييردي. دووار يوخاري قاطار چکن قاريشقالارا باخدي. ساري دونونداکي قاپ قارا ،کونجوده بنزر نارين خاللارا اليني سوردو. سونرا دووار ديبينه بير شي‌لر سيلکر کيمي غريبه حرکت‌لرله أته‌ييني يئللتدي.باشينين اوستوندن کئچن قارغادان ساعاتي خبر آليب اونا تشککور ائله‌دي. گلدييي يولا ساري دؤندو. قاييتماق ايسته‌ييردي.شاشيب قالميشام. من بئله دوشونمه‌ميشديم حئکايه‌مي. ايندي کوچه‌لرينين باشينا چاتيب اوردا شاهيني گؤروب اونونلا دارتيشمالي ايدي. شاهين اونا “تک داش” اوزوک آلميشدي.اؤندن قوتور بير ايت ياخينلاشيردي. أييليب يئردن اووجونا قابلاشان بير داش گؤتوروب آتدي.
ديکسينه‌رک چيغيريب گؤزومو توتدوم. بير آن آياغا دوردوم. ماسانين اوزه‌رينده کي مطالعه چيراغيم دوشوب سوندو. قورخودان دئشنه توتار کيمي قلمي اؤنه دوغرو توتموشدوم. قان دامجيلاري بارماقلاريمين جيغيريندان آخيب کاغاذلاريمين عيفتين لکه‌لنديردي. دوردوغوم يئرده أيلشديم.کندين تزک قوخولو سويوغو ايشيق‌لا برابر پنجره‌سيز اوتاغيمين باکيره‌ليين پوزموشدو.رنگلي پونس‌لرله شکليني اؤنومده کي ديوارا ووردوغوم “اوريانا فالاچي” الي چنه‌سينده احواليما باخير اونون سول طرفينده کي “مرضيه اوسکويي”ده هابئله. گؤزلرينده کي دينمز حوزون مني ساکين‌لشديرير.اؤنومده بير ديشي جاناوار ال‌لريني اؤلچه_اؤلچه شاشقينليغيما چيمخيرير “سن کيمسن منه يول گؤرسه ده سن؟ يورولدوم کلمه‌لريزه قول اولماخدان! مني او ائوه قايتارانمازسان”ايکي ميلچک، بيري بيرين قووالاياراق بير دؤور قيزين باشينا دولانيب قولاغينين ديبيندن کئچديلر سونرا ويزيلدايا_ويزيلدايا گليب کاغاذلاريمين آرتيق آلين يازيسينا قاريشان قان لکه‌لرينين اوستونده أيلشديلر. اوست_اوسته. ائله مشغول کي دونيادان خبرسيز. اؤز_اؤزومه “بو اوتانمازلارا باخ يئر تاپديلار کئف‌لرينه” ميزيلدانيب، اوچماقلاريني بيلسم ده قلمين اوجويلا اونلاري کاغاذا ميخلاماق ايسته‌ديم. سول أليم هله گؤزومون قوللوغونداايدي.اليني اوزاديب غضبله بيله‌ييمدن توتدو– نه ايشين وار آللاهين حيوانينان؟ اولمويا دئييرسن بس اولاري دا کاراکتئرلرين کيمي هارا خوشون چحسه گؤندره بيلرسن؟
يازماقدان يورولموش بيله‌ييمده آغريني حيس ائله‌ديم. بارماقلاريندان قورتارماق اوچون يئريمدن دوردوم. هله تام اؤزومه گلمه‌ميشديم.
أته‌ييني قالخيزيب جيبيندن ايپک بير دستمال چيخارتدي. اليمين قانين دريب گؤزومدن آييردي. بيراز اؤنجه کي غضبدن اثر يوخ ايدي. داها ساکين داها معصوم گؤرونوردو.
گؤزومده گؤي‌لر گورولداييردي . آچا بيلميرديم. اوزومون قانين تميزله‌ييب چاپيلان قاشيما ديققتله باخدي “آخ آخ قولوم سينئيدي گؤر نئجه ده ياريليب،بتادينين وار”؟باشيمي اوتاغين ياريم آچيق قاپيسي‌نا ساري دؤنده‌ريب ميطباغا ايشاره ائله‌ديم. قيوراق قاچدي. اؤز اليله قويموش کيمي ايلک يارديم قوتوسونو تاپيب گتيردي. ايکيميزده أيلشديک. بتادين ووروب يارامي باغلادي. سونرا اليمي توتوب “باغيشلا” دئدي.ايلمک سالماق دفه چالماقدان أييلميش ظريف بارماقلارينا باخاراق باشيمي آلت_اوستلي لاخلاديب قبول ائله‌ديم. دانيشسام سسيم چيخاجاق‌مي چيخماياجاق‌مي دئيه شوبهه ائديرديم آنجاق “داي دور نرمين! هاوا قارالير آرتيق،آنان نيگران قالار” دئديم.– من نرميني سئوميرم ! آديم باهار اولسون. بيليرم او لاينشعور شاهينين آدينا ياراشديريبسان آديمي آما اوننان منه يار اولماز. کتده دادماديغي قيز قالمييب. بوتون قالاق‌لار بونا شاهيددي. آييق اول سني ده آللاتماسين!گؤزلريمي اوزونه ديکديم. نه غريبه رنگي وارايدي. آغيندا اينتيحار خيمه سالميش گيله‌سينده تهرانين توستولو گئجه‌لري آنيمسانيردي. اوزومه ديک باخديغيندا کيپريک‌لري سئيرک قاشلارينا ده‌ييب گؤز قاپاغينا حيصار چکيردي. چوخ گؤزل‌ايدي.
ال‌لريمي ال‌لرينه آليب سيلکه له دي،– نه باخيرسان دي دور! جلد اول ياز قارانليغا ساخلاما مني. من بيلالي سئويرم. مني اونا يئتير سورا باشيما نه اويون گتيريسن گتير!فيکريمدن بيلانين سون گؤروش‌لريندن بير آي سونرا اؤلمه‌سيني اونا نئجه دئيه‌جه‌ييمي سوزدورسم ده “بس آنان نه اولاجاق”؟ دئديم.ديزلرين قوجاغينا ييغيب ال‌لريله برک_برک توتموشدو.– بيلميرم! آتام يئر سوواراندا باشينا وورولان بئل ضربه‌سيندن اؤلننن سورا ميرزه قادير آناما ساللادي، او ايندي منه گؤره أره گئتمير، من اولماسام لاپ هودو گئدر. خولاصه کي من او ائوه قاييدانمارام. بياخدان بيلانينان هر نه‌يي دانيشميشيخ. بيز بيربيريميزي چوخ سئويريک. او بوگون دئدي »گل قوللاريمين حبسينده ابدي اولاراق ياشا قوي من ده گؤزلريوين مئشه ليينده عؤمورلوک ايتيم«. سن چکيب بورا گتيرمه سئيدين ايندي باجيسي ائويندئيديک. آنامادا زنگ ووروب دييه‌جئيديلر باهاري قاچيرتميشيق. قوتاردي گئتدي.
بورگه‌لنميش يازيچيليق غرورومو بير تهر دوغرولدوب “ياخشي سن راضي اول قاييت ائوه من باشدان باشلاييب هر نه‌يي يولونا سالارام. نئجه دي”؟ دئديم.دولوخساييب “يوخ اولماز، نييه باشا دوشموسن آخي قاييدانمارام. مني اورا قايتارسان اؤزومو اؤلدوررم” دئييب باخيشلاريندا کي ايسلاق گؤيرچين‌لري اوره‌ييمين گئنيشلييينده اوچورتماق ايسته‌دي.
ال‌لريمي ايکي طرفدن قول‌لارينا آتيب شفقت‌له سيخديم.– عزيزيم بير منه باخ! تکجه سن و بيلال دئييل کي باشقالارينين دا تکليفين معلوم ائله‌مه‌لي‌يم. من هئچ بيلالين باجيسين تانيميرام! هله ميرزه قاديره گلينجه، او هوللوکبازين بيريدي آنانا گون آغلاماز. شاهين هر نه ده اولسا سني گئرچکدن سئوير. باشي داشا ده‌يه‌جک. شهرده گؤزل بير حاياتيز اولاجاق. گؤزلري سنه بنزه‌ين ساريشين دا بير اوغلوز، رامين آديندا. . .
آرتيق بيربيريندن آيريلميش ميلچک‌لرين بيري قانا بولاشميش بارماغيمين اوستونده ضيافت ماساسيندا أيله‌شر کيمي ال‌لريني بير بيرينه سورتور هردن ده باشينا چکيردي.آياغا دوردو. معصوميتي‌نين يئريني غضبه وئرميشدي. کاغاذلاري ماسامين اوزه‌ريندن آلدي. نارين_نارين دوغراييب اوزومه چيرپدي. “من بيلالدان بويلويام” دئدي. . . !