بیر ایشیق اولمالیدیر
رقیههاشمزاده
آنادیلیمیز: دوستاقدانمی قورتارمیشدیم دوستاغامی آتیلمیشدیم بیلمیرم. میلیونجا همقاطارلاریمین هئچ بیری بیلیر کیمی گؤرونموردو. بیزی بوراخیب گئدن قاطار بیرداها قاییداجاقمیایدی؟ بیلمیردیم. هئچ بیریمیز بیلمیردیک. سادهجه بوتون گوجوموزله وعده وئریلن مقصده و هدفه قاچیردیق. اورا چاتان یئنی و مؤحتشم بیر حایات قازانمیش اولوردو. بونو کیم ایستهمز؟ قارانلیقدان قارانلیغا بیر یولچولوق اولسادا ایشیق وعدهسی وئریلمیشدی. باجاریقلی اولان قازاناجاقایدی. یاریشا بنزهر بیر حالایدی. کیمسه دالی قالماق ایستهمیردی. ایچیمی شوبهه چولغامیشدی. بو وعده یالان اولسا؟ بوتون بونلار بیر اویون اولسا؟ بللی بیر مقصد اولماسا؟ هئچ بیر ایشیق منی گؤزلهمهسه و. . .
ایستی سولارین یاتاغیندا دالغالارلا رقص ائدن یوسونلارین آراسیندان یول آچیردیق. بیر چوخو یورولوب دوشوردو. بیر چوخو یالاندیر سونو اؤلومدور دئییب دایانیردی. چوخو ایتیردی یوسونلارین آراسیندا. توپالاشیب دوام ائدیب ائتمهمهیه قرارلاشانلار وارایدی حتی. ایستییه تابی اولماییب دایانانلار و هله ده ایناملا هدفی دوشونهرک قاچانلار. بعضن یاپیشقان دیوارلار اوستوموزه گلیر بیر چوخونو اسیر ائدیردی بعضن ایش بیرلییی ائدیب یول وئریردیلر. دیوارلارا سؤیکهنیب دینجهلنلرین ده دالدان گلمهلرین گؤرمهدیم هئچ.
اؤنوموزه بیر یول آیریجی چیخدی. گؤرونن ایکی تونئل وارایدی. بیزی ایشیغا یئتیرن هانسیدیر دئیه آرامیزدا ولوله دوشدو. سونرا بئله بیر قرارا گلدیک: »هر کس اؤز ظنیجه سئچیب یولا دوشسون«
من و مینلری ساغداکی یولو سئچمیشدیک. یول داها تهلوکهلی داها یوروجو اولموشدو و بو بیزی بونالتماغا بس ائدردی.
اؤنومجه گئدن چوخو وارایدی. اولارا چاتیب بیرینجی اولماغا چالیشیردیم. باشیمی بوتون فیکیرلردن بوشالتدیم. یقین بیر ایشیق وار دئییب سورعتیمی چوخالتدیم. هه بیر ایشیق اولمالیدیر.بیرینجی سیرایا یئتیرمیشدیم اؤزومو. اوچ بئش نفرله بیر خطده گئدیردیک. هئچ بیریمیز اسگیییه وئرن دئییلدیک. بیر آندا تونئل بیتدی گئنیش بیر مئیدانا دوشدوک.
اورتادا توپپوزا بنزر ائیبهجر بیر شئی وارایدی. بیزدن یوز قات هوندور یوزقات یئکه. اؤزل چکیمی وارایدی. سانکی او دالغالی حرکتلرله بیزی چاغیریردی.
یوخسا دئییلن ایشیق بومویدو؟ ایستر-ایستهمز اونا ساری گئتدیک.
گیریش اوچون بیر یولو، قاپیسی یوخایدی. یول تاپماق اوچون بوتون توپپاغین اطرافینا داغیلیشدیق. تاپان اوبیریلری خبردار ائتمهلیایدی. آنجاق هئچ کیمدن سس چیخمیردی. بیردن نه واختسا دویدوغوم بیر سؤزو خاطیرلادیم »قازانماق اوچون دیرنمک لازیم«.
بیر نقطهنی سئچیب گوجومو ووردوم. او نقطهدن گیرمک ایستهدیم. یولو اوردانمیش کیمی راحاتجا ایچهری آتیلدیم. قیسا بیر یول گئتدیم. بیر پارلاق توپپاق داها چیخدی قارشیما. گؤردویوم ایشیق دئییلدی. من ایچ_ایچه، قاپیسیز دار و قورخونج بیر دوستاغا دوشموشدوم. ایشیغا و مؤحتشم حیاتا داییر بوتون خیاللاریم بوشا چیخمیشدی.
اسیر اولموشدوم. اؤزومو قاپیسیز دیوارلارا چیرپیردیم. بیر حیس منی قالماغا زورلامایا باشلادی ایچدن بیر حیس دئییلدی تام جیسم ایستهییایدی. او توپ منی مغناتیس کیمی اؤزونه چکیردی. اوندان کیم اولدوغونو سوروشدوم.گونلردیر اوردا گؤزلهدیینی سؤیلهدی.– یئنی دونیان سسسیزجه اوتوروب گؤزلهمکدن باشلاییر دئدیلر. مؤحتشم بیر حیات سنه قوجاق آچیب. ایشیغا چیخاجاقسان.
اوزگون گؤرونوردو. منده بیر حاللار اولوردو اورتادان ایکییه بؤلوندوم جیسمیمین باش طرفی اونا یاخینلاشدی. ایچیمدن باشقا بیر من چیخدی. قابیق سالدیم. من ده اونا بنزهمیشدیم. یاخینلاشیب توخاندیم. ایچ-ایچه گیردیک. اونونلا قاریشدیم و بیرداها قوپا بیلمهدیم.
آیاغیمیزین آلتینداکی یئر تیترهدی. سونرا سانکی یولا دوشدو. بیر اوچوروما دوشر کیمی حاللار یاشادیق. بیردن ایچینده اسیر اولدوغوم قات-قات دیوارلار آچیلدی اورتادا قالدیق. کیمسه گؤرونموردو. نظره ایستی و راحات بیر یئر گلیردی. اودا بونو دوشونوردو. هر ثانیه بیراز چوخ یاپیشیردیق.
نه قدر زامان کئچدیینی بیلمیرم آما بیز آرتیق آیریلماز اولموشدوق سانکی هر بیریمیز او بیرینین دیگر یاریسی. نئچه گون بیر دیواردا یاپیشیب قالدیق. سونرالار بیر تاپبیلتی دویماغا باشلادیق. او هئچ بیتمهدی. اوراسی وعده وئریلن ایشیغا هئچ بنزهمیردی آما حالیمدان راضیایدیم. أیلنجهلی و ایلگینج بیر وضعیتایدی. هرگون بیراز داها یئکهلیب دؤنوشوردوک. ایندی بیزدن بیراز آرالی آما بیزه باغلی بیرینین حوضورون فرق ائدیردیک. ترپنه بیلیردیک. بوداقلانمیشدیق. اعضالاریمیز گون به گون چوخالیب بؤیویوردو. بؤیویوردوک.
ایچیمیزده ایستی بیر شی زوق آتیردی بوتون ووجودوموزا. هردن آنلاشیلماز سسلر دویوردوق.
اوزون زامان کئچدی. مین ایله یاخین بلکه!
تام و بام باشقا بیری اولموشدوق. مستقیل بیر وارلیق. او بیزدن یارانمیشدی. یوخسا بیز اوندا یاشاییردیق؟نهدیرسه آرتیق او مکانا سیغیشمیردیق. ایشیق وعدهسینه
آلدانیب اسیر دوشدویوموزو دوشونوردوک. هر ترپندییمیزده بیر باشی بیزه بیر باشی اؤنوموزدهکی دیوارا باغلانان ایپ بیزی سارسیدیردی. اسکی حالیمیزدان خبر یوخایدی. بام باشقا بیر مؤوجود اولموشدوق.
عاغلینا بیر سؤز گلدی. بونو هارداسا دویموشدو. هارداسا یاشامیشدی. دیرنمک. سونرا بوتون گوجویله اؤزونو دیوارا چیرپدی. اولمادی. بیرده و تکرار بو ایشی گؤردو. او دیواری یاراجاغینا اینانیردی. چیغیرتی سسی دویدو. قلبی چیرپینماغا باشلادی. سس گئتدیجه اوجالیردی. هیجقیرتی، سیزیلتی،باغیرتی ، عجله ایله دانیشیق ،قاچ ها قاچ و بو کیمی سسلر. اؤزونو راحات حیس ائتمیری. یئر ترپنمهیه باشلامیشدی. بوغولوردو. سسی چیخمیردی. سون گوجونو توپلادی. چیغیراراق اؤزونو دیشاری آتدی.ونش گؤیون دوز اورتاسیندایدی. . .
نوشته شده توسط admin در شنبه, ۲۶ اسفند ۱۴۰۲ ساعت ۸:۴۷ ق.ظ