گئجه‌لر آي ايشيغيندا

گئجه‌لر آي ايشيغيندا آنامدان گيزلي اورتا دوواري پيچاقلا دئشديگيم گوندن؛ بئش گون گئچيب. بو گون ايکينجي گوندور نازلي‌دان خبر يوخدور. يوخسا ايندي کؤرپه اوشاغي قوجاغيندا آلما آغاجينين کؤلگه‌سينه سيغيناراق، آنا‌سينين قارشيسيندا اوتوروب،گؤز ياشيلاريني سيليردي.
ساواشميش اولا بيلرلر. آمما دئيه‌سن نازلي نئچه گون قاباق آناسينين نصيحتلرينه و کؤرپه اوشاغينا گؤره تصميم توتوب کوسمه‌دن آناسي گيله گلمه‌يه. يوخسا بو ايکي گونده موراد حتما” نازليني دؤرد دفعه دؤيوبدور.
نازلي ايله موراد ساواشاندان بري منده ايشي – گوجو بوراخاراق حيطده اوتوروب نازلينين آناسينا ائله‌ديگي شيکايتلره قولاق آسميشام. نازلي “مامان بودور با، باخ گؤر قئييشينن قيچيمي‌نه گؤورديب” دئيه‌نده اوزومو شددتله دووارا ياپيشديريب سانکي قولاغيملا اونون گؤورميش قول – قيچيني گؤرمک ايسته‌ييرديم.
ايکي ايل قاباق نازلي او گئده‌يه آداقلي اولاندان سونرا منده اونو اونوتماق اوچون سيگارلا ساغ اليمين ايچينه داغ باسيب هم نازليني هم ده سيگاري ترک ائله‏‌ديم. بوگون ده پيچاغين دسته‏‌سي اليمين ايچينده بير بؤيوک داغ ايزي بوراخيب.
نئچه ايل قاباق داييم دئدي: “اوغول بالا يا ايندي بئکار يا دؤرد ايل سونرا، ايسترسن گل اؤز يانيما ايشله‌يک”. دوز ده دئييردي محله‏‌ده چوخلو دانيشگاه قورتارميشلار ايشسيز‏‏‌ايديلر‌، من ده ائله دانيشگاهي ايلک تئرمده بوراخاراق پول قازانماق اوچون داييم ايله باشماقچيليغا باشلاديم. داييم مندن آلتي ياش بؤيوک اولسا دا بو اوچ – دؤرد ايلده ياخشي يوللانميشديق.
ايشين ايلک گونلرينده چکيش اليمين ايچيني آغريديردي. يونس داييم دئييردي: “اولسون اليوين ايچي هله ياخشي پيشمه‌‏ييب بير نئچه آي چکيشي ايشلتسن اليوين ايچي برکيير ائله منده تازا باشماقچيليغا گلنده اليمين ايچريسي سولوق چالدي‌، سولوغا اؤنم وئرمه‏‌دن چکيشين دسته‌‏سيندن داها دا گوجلو ياپيشديم. هر زامان اليوين ايچريسينده سيگار سؤندوردون اوندا اؤزووه گؤره بير اوستا اولموسان‌، باخ منيم اليمه “‌، سيگارين کؤزو تاسيلداييب الينين ايچينده کي قاباردا سؤنموشدو.
سحرلر نازلي‏نين يوخوسو ايله دوروب اونو اونوتماق اوچون چؤرک آلماغا گئديب‌، گون اورتا چاغي اذان سسشي ايله داريخاراق گينه نازلي ياديما دوشور. آنام حووض قيراغيندا دستناماز آلاراق ايکي گؤزو منده‌دير، مچيده ساري گئده – گئده ديل آلتي “گؤزل آغا چوخ گؤزل ايدي ووردو چيچک ده چيخارتدي‌، آللاه گؤروم او يونيسي نه‌دييم ائله‏‌مه‏‌سين” دئدي.
آنام ائشيگه چيخاراق منده تلسيک حيطين آلت قاتينا يئنيب‌، يونيس داييمين وئرديگي ايچگيدن ايچمه‌‏يه باشلاييرام‌، ترک ائله‏‌دييم سيگار قوخوسو ياديما دوشوب بئينيمين اينجه دامارلارين قاماشديرير دووارين دليک – دئشيگيندن سيگار کؤتوگو تاپيب‌، تئز آليشديريب‌، بير درين پک ووراراق ائله توستو ايله اورتا دوواري آشيب نازلي گيلين حووضلارينين قيراغينا سؤيکه‌نيب آلما آغاجينين آلتينا داليرام.
دووارين دئشيگيندن بير شئي گؤرونمه‏‌يير‌، گؤردويوم يالنيز اورتايا آتيلميش اويونجاق قاب – قاشيقلار و کرتي قيراغيندا خراب قالميش ائو‏دير.
اوشاقايکن حکيمه خالا (ائو بير قونشو اولدوغوموزا گؤره خالا دئيرديم) حيطين قوزئي يانيني سولاييب سوپورندن سونرا نازلي ايله من آلما آغاجين آلتيندا پالاز ساليب قوناق باجي اوينارديق‌، او، بالاجا اللري ايله اويونجاق قاب – قاشيقدا يئمک پيشيرردي منده کرتي‏دن ليغ دوزلديب ائو تيکرديم. ياغيش ياغيب داملالاري آلما آغاجينين يارپاقلاريندان زويولده‌‏ييب تؤکولنده نازلي گؤيه باخاراق ” آي کيشي بو دامين دليک – دئشيگينه يئتيش بوگون – صاباح دام باشيميزا گلجک‌ها ” دئيردي.
منده بيراليمده آينا بير اليمده ده قئيچي بيغلاريمين اوجونو ووروب سونرا ياغيش داملالاريني اونون ياناقلاريندان سيله‌رک “هه خانيم دوز دئييرسن ؛ آ‏مما بير آز دؤز. قاباقدا ياغلي بير معامله وار دوعا ائله يئرينه گئتسين‌، دام – داش کي سهلي‌دي‌، سنه ده ياخشي يئتيشمه‏‌لييم ” دئيرديم.
من آرخايينام موراد نازليني سئومير، يوخسا گونده ساواشيب اونو وورماز ايدي. گوناهلارين بير آزي حکيمه خالا بير آزيدا منيم آنامدايدي.
حکيمه خالا منيم‏له نازلينين بيري – بيريميزي سئوديگيميزي بيليردي‌، ائله اونا گؤره ده آنامي‌قيرخ بير مرثييه‏‌ده گؤروب دئميشدي‌، آنام ايسه خديجه خالايا: بونلار نه سؤزدو ” گئت قيزيوي ييغيشدير ” دئميشدي.
نازلي دانيشگاها چيخاندان بري آنامين گؤزوندن داها دا دوشموشدو. من هر زامان نازلي‌نين فيکرينه دالاندا آنام اونون ايرادلاريندان دئيردي‌، “اودور با پروين خانيم دئييردي اؤزوم بو ايکي گؤزومونن گؤردوم نازلي اوتوبوسدا چارشابين آچميشدي‌، هله تئللرينده چرقت دن چيخارديب آلنينا تؤکموشدو سونرا محله‏‌يه يئتيشنده چارشابين اؤرتموشدو. آللاه آپارسين گتيرمه‏‌سين هئچ کسي تانيماق اولمور. من بو قيزي اؤز قيزيم کيمي‌بيلرديم، آمما ايندي قاش – قاباغي يئرينن گئدير.
بير قورو سلام وئرميه‌ده آرينير. ائله بير من دئميشم چارشاب اؤرتسون. هله پروين باجينين سؤزو بير يانا من اؤزوم دققت‏له نازلي‌يا باخميشام، هله قاشلارينين آلتيني دا گؤتوروب آللاه گؤرستمه‏‌سين دوغرودان آخرالزمان دئييرلر بودور”. آنام‌، نازلي‌نين چارشابينان – تئليندن قاشيندان دئينده من نازلي‌يا داها دا ماراقلانيرديم.
حکيمه خالا‌، آنامين ” گئت قيزيوي ييغيشدير ” سؤزونو نازلي‌يا دئيندن سونرا نازلي اوجا سسله گولوب ” او دئيير به من ليلي اولموشام اونون دا اوغلو مجنون ؟” دئييب ؛ منيم فيکريمي‌باشيندان آتميشدي. نه بيليم بلکه ده آتماميشدي. يوخسا اوشاغينين آدينين اوليني منيم آديمين اوليندن قويماز ايدي.
بو سيرتيق گئده کچل موراد نم‌هاردان نازلينين مندن کوسدويونو بيلميش اولمالييدي کي ائله اوچ – دؤرد گونون ايچينده اونا ائلچي يوللادي‌، نازلي دا ايستر ايسته‏‌مز اونا ” هن ” جوابي وئرميشدي.او گوندن بري کئچل گده‌هاچان نازلي‌گيله گلنده‌، بير يوخاري مودئللي ماشيني قاپيلارينين قاباغيندا ساخلاييب حيطده اوجا سسله اونا “بيليرسن سني اله گتيرمک اوچون نلر چکميشم ؟ ” دئيردي. يادا بير يابانجي ديلده نوستالژيک (اوگده‌‏نين دئديگينه گؤره) بير شارکي آچارکن باندلاري بيزيم حيطه ساري قويوب سسين اوجالديردي.
منده سيگارين ترکيندن چيخاراق سيگاري – سيگار کؤتويونه يانديرب گؤزلريمي‌يوموب سيگارين توستو ايله دوواري آشيب ائله او شارکي ايله بير اليم نازلي نين الينده اوبيري اليم ايسه اينجه بئلينده رقص ائله ييرديم.
بير جوت پوتين باشماق دمير قاپينين دئشيگينين او تاييندا داياناراق بير آن اؤزمه گلديم. دمير قاپي جيرها جير آچيلاراق باشيما ديدي‌، سالونون ايشيغينين اثرينده سول گؤزوم ده يومولدو.
گؤزتچي “هه سيچان کيمي‌نه آختاريرسان ؟ اولمايا بو بالاجا دليکدن قاچماق ايسته‌ييرسن ” دئيه ياخامدان ياپيشيب سئللولدان ائشيگه چکه‌رک سورغوجونون اوتاغينا آپاردي.
Arazazarbaijzn.anadilimiz@gmail.com