ناساز چالينان نوْت‌لار يوْروجو و داريخمالي اوْلور

قونشونون کيشي‌سينين آياق سسينه قولاق ياتيرديرسان. بير، ايکي، اوٍچ، دؤرد… بولورسن آياغيني بئشينجي پيلله‌يه قوياندا، سس داها قولاغيوا چاتماياجاق. آرخان اوٍسته گَرنه‌شيرسن. قوْللارين ساچلاريوا توْخونور. اؤز وجودوندان خوشا گليم بير خيشيلتي‌ سسي قالخير. تنبل- تنبل ساغا دؤنورسن.
ساچين بالينجا سوٍرتوشور. گئنه ده بير خوشا گليم موسيقي ايله خوشا گليم حيس… بو حيس عشقين ده‌يريني سنه خاطيرلادير. اوره‌يين سيخيلير. هر گوٍنکو کيمي اوره‌ييوين سيخيلديغينا قارشي گليرسن. شيلتاق اوشاقلار کيمي جوٍت قيچلي يوْرقاني ياتاقدان يئره ايته‌له‌ييرسن. يومشاق بير تيپپيلتي سسي. بولورسن تک- تنها ياتماغيوا اعتراض سسي‌دير بو تيپپيلتي سسي.
»هاميدان اوّل اؤزووو سئومه‌ليسن!«
ذهنيوين سسيني آيدين- آشکار ائشيديرسن. ذهنينده‌ اعتراض ايله توْختاخليق قارشي- قارشييا دايانير. يئريندن قالخيرسان. آياغا دوراندا ديزلريندن شيققيلتي سسي گلير. آرتروز سسي… خوشا گليم دئييل، آمما اينديکي وارليغيوين بير پارچاسيدير؛ ناساز چالينان بير نوْت‌دور بو شيققيلتي سسي. ناساز چالينان نوْت‌لار هميشه يوْروجو و داريخمالي اوْلور. گئنه هر گون تکرار ائله‌دييين سؤزو اؤزووه تکرار ائليرسن: »موزيسين اولسايديم بدنيم ايله أشيالارين توْخونوشوندان بير سمفوني يارادارديم.«
دمپايي‌لاريوي گئييرسن. آياقلارين ايله دمپايي‌لارين بير- بيرينه سوٍرتوشور. آمما بو سوٍرتوشمه‌‌نين سسيني ائشيتميرسن، يالنيز حيس ائديرسن. ياتاغيوي موٍرتّب ائله‌يينده يوْرقان يومشاق يئل سسي ايله ياتاغين اوٍستونه دوٍشور. بالينجيوي تاپدالاييرسان. أللرين ايله بالينجيوين توْخونوشوندان، ده‌ريسي ايسلانميش ناغارا سسي قالخير.
هر گونکو کيمي تووالته گئديرسن. سيٍار فرنگي تووالت اوٍسته اوتوروب، لذت ايله بدنيندن آخان شيريلتي سسينه قولاق ياتيرديرسان. آمونياک‌لي اولماغينا دئييل، ذهنينده بير چشمه‌نين گؤزه‌سيندن سو آخير. تووالتده بو شيريلتي سسيني کشف ائدن گون او قدر هيجانلانميشدين کي، بو سوسوزلوق زاماندا نئچه دقيقه سويو آچيق قويموشدون تا بوْش- بوْشونا تووالتين کاساسينا آخسين.اوْووج- اوْووج سويو اوٍزووه چيرپيرسان. اينسان جانيني ديرچلدن موسيقي سسي… اوٍزووو حوله ايله سيلمک يئرينه بوراخيرسان ده‌ريوين اوٍستونده‌کي نم آستا- آستا قوروسون. قولاغين قادير دئييل سو قطره‌لرينين ده‌ريوه نفوذ ائتمه‌سينين سسيني ائشيتسين. بونونلا بئله، ذهنينده سوسوز بير زه‌مي سويو اؤز ايچينه چکير.
آينا قاباغيندا دايانيرسان. او ايسه لال ديلي ايله سنين گؤزلرينله دانيشير. گؤزلريوين آلتينداکي قيريشيقلارا کِرِم ياخيرسان. سونرا تيپ تيپ تيپ… باغلي بير صانديغي دؤيمک کيمي يومشاق بير سس قالخير. کِرِم، قيريشيقلاري ايتيرديکجه، گؤزون باخا- باخا بو تيپ- تيپ، سنين ده، آينانين دا باشينا بؤرک قويور.
تاختا داراغي قيوريم ساچلاريندا گزديريرسن. ساچ ايله داراق موسيقي‌سي… ساچ ايله أل توْخونوشوندان قالخان موسيقي‌ني اؤزله‌يير، أليوي ساچيوا چکيرسن. گئنه يومشاق بير خيشيلتي سسي قالخير. اؤز ألين اؤزله‌دييين لذتي ساچيوا وئرمير. دوْداقلارين آينادا ترپه‌نير. سسين اوتاغين سوٍکوتونو سينديريب، قولاغيوا دوْلور:
»اي شانه بو گيسوي پريشانه دوْلاشما
جان ريشته‌سي وار اوردا، چکيل يانه دوْلاشما«
داراق ايسه گئنه ساچيوا دوْلاشير… پيرتلاشيقلار آچيلير. سن تبسّوم ائله‌ييرسن.تيق… تيق… اوجاق شؤعله‌سي يانماقدا فنده‌يين تيققيلتي سسي کسيلير. فنده‌يي اوجاغين کنارينداکي ميز اوٍسته آتيرسان. تيق!… آمما بو تيق سسينين جينسي فنده‌يين تيق سسيندن فرقليدير. يخچالين موتور سسي ديققتيوي چکير.
يخچالدان پنير ايله اوٍزوم چيخارديرسان. چايدان اوجاق اوٍسته اؤنجه آستاجا سيزلايير، آز سونرا قور- قور قاينا‌ماغا باشلايير. چاي دمله‌ييرسن. هميشه سئوديين شيريلتي سسي قالخير. پنير ايله اوٍزومو يويورسان. گئنه شيريلتي سسي، گئنه سو سسي…
هر گونکو کيمي ميز باشيندا أيله‌شيب، سحر يئمه‌ييني يئينده ديش ايله چؤره‌يين توْخونوش سسينه ديققت وئريرسن. چايوي ايچنده هؤرتولده‌ديرسن. ايستيکان- بوْشقابي يويورسان. گئنه سو سسي ائوين ساکيت‌ليييني پوْزور.
ميز باشيندا أيله‌شيب، کيتابدا علامت قويدوغون صفحه‌ني آچيرسان. واراقلاماق سسي… اوشاقليغيندا بارماغيوي ياشلاييب، دفتر- کيتابي واراقلاديغين ياديوا دوٍشور. اينديسه واراقلاماقدا اوستالاشيبسان.
ساعاتا باخيرسان. بير زامانلار ساعاتين سسي اوتاغيوين وارليغيندان ساييلاردي. اينديسه موبايليوين ساعاتينين عادت‌کرده‌سي اولوبسان. هر ثانيه‌ عددلر بير- بيرينين آلتينا سوٍيروشوب، زامان کيچيک بير مقياسدا سس‌سيز- صداسيز ده‌ييشيلمکده‌دير. ايستر- ايسته‌مز ساعات دا سنين کيمي يوخاري قالخماغا محکومدور.
کامپيوترين آرخاسيندا أيله‌شيب، بارماقلاريوي ذهنيوين قوُللوغونا بوراخيرسان. بارماقلارين اوْتوماتيک بير ماشين‌دير دئيه‌سن، کئي‌بوْردون دوٍيمه‌لري اوٍستونده ضرب توتوب. بو آندا وجودووون چاليشان بؤلوم‌لري يالنيز گؤزلرين ايله بارماقلاريندير.
پيچاق ايله کاهي‌، يئرکؤکو ايله رنده، قابلاما ايله قاپاق، بوْشقاب ايله قاشيق توْخونوشو، يئمک ايله ديش سسي دوٍنيانين أن دادلي موسيقي‌‌سيدير، يالنيز سس‌سيزليکده، تنهاليقدا اينسان اونلاري دوُيار. گئنه ده هر گونکو کيمي يئمک واختي اؤز يانيندا دوٍشونورسن: »من موزيسين اولسايديم يئمک و اينسان آديندا بير سمفوني يارادارديم.«
آخشام‌چاغي‌دير. گئنه ده سو سسي ائوين سس‌سيزليييني سينديرير. بير اوٍشتوبين ناري يويوب، بوْشقابا قويورسان. نارلا أليوين توْخونوشو سويون سسي آلتدا گيزله‌نير. ناري دادماميش، آدي آغزيوي سولانديريب. ديل ايله داماق سسي… پيچاق گتيريب، ناري کسمک ايسته‌ينده غيرعادي بير حاديثه‌ ايله اوٍزبه‌اوٍز اولورسان. بير پاپيش‌تيکن نارين پوٍسگوسوندن يوخاري قالخير.
ائوين سس‌سيزلييينده حئيرتله پاپيش‌تيکنه باخيرسان. ناري يئمکدن واز کئچيرسن. أليوي چنه‌وه ديرسکله‌ييب، پاپيش‌تيکني ايزله‌ييرسن. قولاغين اونون يئريشينين سسيني دوُيمور. ديل- دوداغين ترپنمه‌سه ده ذهنيوين سسيني آيدين- آشکار ائشيديرسن: »ائله بيل داغدان يوخاري قالخير!«ذهنيوين سسينه اوشاق کيمي پيققيلداييب، گوٍلورسن. أييليب ديققتله پاپيش‌تيکنين أل- آياغينا باخيرسان. خال- خال قانادلارينين آلتيندا نه داش وار، نه ده قوم. آمما اوشاقليق چاغلاريوين سسيني چوخ اوزاقلاردان ائشيديرسن… بير پاپيش‌تيکن بارماغيوين اوجوندان يوخاري قالخير. يئددي ياشلي بير قيز هيجانلا گوٍلور.
ساعات اوْن‌ايکي‌يه دوْغرو يوخاري قالخماقدادير. سن ايسه ياتاغيندا يوْرقانيوين آلتينا سوٍزولورسن. يوخوندا بير قيز اوشتوبين نارينين پوسگوسوندن يوخاري قالخير.
تيققيلتي سسي ائشيديرسن. بولورسن قونشونون قاپيسي ايشگيللندي. گؤزلريوي آچيرسان. بولورسن ساعات آلتي ياريمدير. قونشونون کيشي‌سينين آياق سسينه قولاق ياتيرديرسان. بير، ايکي، اوٍچ، دؤرد…
Arazazarbaijzn.anadilimiz@gmail.com