زيبيل قابي

زيبيل قابي دميردن دوزه‌لينميش، دؤرد تکرلي، آلومينيوم رنگلي و اساسي بير قاب اولاراق، اطرافيندا اونو گؤتوروب بوشالتماق اوچون مؤحکم قولپ دا وار ايدي.
بير قارا، بير ساري و بير بوز پيشيک، زيبيل قابيندان داشيب آسفالت اوستونه تؤکولموش شيره‌لي يئمکلردن يئييرديلر. پيشيکلر اخلاقچي و اؤز حق‌لرينه قائل اولان اوچ انسان کيمي، بول نعمتين آشيب داشماسيندان فرحله‌نيب، مهربانجاسينا يئمه‌گه مشغول ايديلر.
زيبيل قابيندان آخان سو، آسفالت اوزه‌رينده آخيب، دامجي- دامجي سو آرخينا تؤکولوردو. آرخين ايچيندن کؤپوکلو و شيرولو سولار اهمالجاسينا آخيرديلار. ائولردن گلن حامام، مطبخ و قالچا يووان قادينلارين آرخا بوراخديغي سولار، زيبيل قابيندان گلن شيرولو سولاري اؤزونه قاتيب آپاريردي.
چؤرکچي‌خانادا چؤرک نؤوبتينده دايانان نئچه اوشاق و نئچه قاري- قوجا بعضاً چؤرکچي شاطيرا، بعضاً شيرولو سولارا و بعضاً ده بيري بيرينه باخيب صُنعي گولوش‌لر آل-‌ وئر ائديرديلر.
شاطير خميرلي اليني بير داها پوز دستگاهي‌نين صفحه‌سينه چالدي و »ائوين ييخيلسين دستگاه يييه‌سي« دئيه، موشتري‌لره دئدي:
اولمادي، اولمادي! يا نقد پول گتيرين يا دايانين سيستم دوزلسين!
بير قوجا کيشي راحتسيزليقلا الينده‌کي چؤرک سوفره‌سيني تور ميزين اوستونه آتدي. »آخي نقد پولوموز هاردادي« دئيه، دوداغي‌نين آلتيندان ميزيللاماغا باشلادي.
زيبيل قابي‌نين اينسي‌سي بير سرعتلي يئلين اثرينده، چؤرکچي‌يه دولدو. قوجا بير قادين رنگارنگ چادراسي‌نين اوجو ايله آغيز- بورنونو توتدو. اوشاق‌لار اؤسکوردولر و شاطير خميرلي و اونلو الي ايله لاواش‌ياپاني ايستي دميره چالارکن، بورنونو توتدو.
چؤرکچي‌نين قارشي‌سيندا آلاياش باققال، گؤيه‌رنتي‌لري سولايارکن، بير ياش تليسي اونلارين اوستونه چکيب، موشتري‌يه دئدي:
نه قده‌ر دئييرم سبزي‌لري گؤتوردوز، بو تليسي چکين اوستونه، آمما هئچ کيم قولاق آسمير!
موشتري دئدي: حاجي عمي، چوخ راحتسيز اولما، آخي راحتسيزليغا اساس يوخدور، سبزي‌دي ده! آلينماز آخشام سبزيچي گليب قايتارار آپارار.
قوجا باققال دئدي: قارداش بالاسي، بس من بورادا علّاف‌- عولّاف، اونا- بونا باخاجام. بونلار ساتيلماسا من دخيله نه آتاجام. ايندي بودور ها، گلدي تلفون، سو، گاز، برق فيشي‌!
کارمند قيافه‌لي موشتري، الينده‌کي نايلونلاري او بيري الينه وئريب، ويداع‌لاشارکن، بوش اليني بورنونا توتوب اوزاقلاشدي.
آلا- بولا بير پيشيک، ياواش- ياواش اؤزونو زيبيل قابينا يئتيررکن، بير طرف‌دن يئمه‌گه و آختارماغا باشلادي. بو پيشيک تويوق سوموگونه قاريشميش آت- آشغالي بير نايلون‌دان جيريب تؤکدو، سونرا بختورجه‌سينه قويروغونو بولاماغا باشلادي.
بير ساعات‌دان سونرا، زيبيل قابي‌نين اطرافي رنگارنگ پيشيکلرله دولموش گؤرسه‌نيردي. آما يالنيز اوچ يئکه پيشيک (بير قارا، بير ساري و بير بوز پيشيک)، زيبيل قابي‌نين ايچينه گيرميشديلر و موووللاشا- موووللاشا يئمه‌گه مشغول ايديلر. يئرده قالميش يئددي- سککيز کيچيک پيشيک، آشغال‌لاري ديديب داغيدارکن، برک رقابت ائديرديلر. گئت- گئده يئمه‌لي زيبيل آزالير و پيشيکلر حيرصله‌نيب موووللاشماغا باشلاييرديلار.
بو حين‌ده آلا- بولا يئتيک و جسور بير پيشيک جسارتله‌نيب، زيبيل قابي‌نين ايچينه آتيلدي. اونون زيبيل قابينا آتيلماغي‌له برابر، ايچري‌ده بوغاناق قوپدو. ساواش سسي خياباني آلدي ياتدي. ائله بيل بو دؤردونجو پيشيک، او اوچ پيشيگين آرامشي‌ني پوزموشدو. نايلون‌لارين شاققيلتيسي پيشيکلرين موولتوسونا قاريشميشدي.
ساواش و موحاريبه‌‌ آغيرلاشيردي. ايچري‌ده‌کي پيشيکلر سونرادان گلن آلا- بولا پيشيگي نامحرم بيله‌رک، هاراي- داد سالديلار. هئچ کيم بيلميردي اورادا نه کئچير. آشاغيداکي پيشيکلر، باش‌لاريني آشاغي‌يا ساليب، آز- چوخدان يئمهگه و يالاماغا مشغول ايديلر. اونلار ايچري‌‌دن گلن سسي ائشيدرکن، اورادا بير خبرلرين اولدوغونو دوشونوردولر.
آلا- بولا پيشيک ساواش صحنه‌‌سينه باخارکن، اوراداکي پيشيکلري قانا بلشميش گؤردو. اورتادا بير قوزو جمدگينه بنزر بير شئي گؤرونوردو. اوچ پيشيک يئمه‌گه مشغول ايديلر. اصلاً ساواش يوخ ايدي. آما ندنسه ائشيکده‌کي‌لر صُنعي بير ساواش سسي ائشيديرديلر. يئکه پيشيکلرين بيري، ايلک اؤنجه سورادان گلميش آلا- بولا پيشيگي ساکتجه‌سينه بير مدّت نظر آلتينا آلدي.
سورا ائله بيل اونو جسارتلي بيله‌رک، زيبيل قابيندا قالماق نيّتينده گؤردو. اونا گؤره گوجونده نه گوج وار، پنجه‌سيني اونون صيفتيندن بئله ووردو کي، آلا- بولا، دؤردونجو پيشيک زيبيل قابيندان آتيليب، خيابانين اورتاسينا دوشدو.
پيشيک‌لرين آراسيندا شاواش گئدرکن، چؤرکچي‌‌خاناداخي‌لار سيستمين دوزلمه‌سيني گؤزله‌ييرديلر. نقد پولو اولان‌لار چؤرک‌لريني آليب گئديرديلر، آمّا کارت ايله گلن‌لر، آياق اوسته منتظر دايانميشديلار. شاطير چوخ عصبي‌لشميشدي. پيچاق وورسان قاني چيخمازدي. بو آندا شاطيرين شاگيردي دئدي:
اوستا، نئيلييک، سيستم دوزلمير آخي!
شاطير، شاگردين رقّتلي سسيني ائشيدرکن، بيردن بيره، حيرصيندن ال آتدي پوز دستگاهيني گؤتوروب، خيابانا تونلادي. پوز دستگاهي، زيبيل قابي‌نين ياخينليغيندا، آلا- بولا پيشيک دوشن يئره دوشدو. زيبيل قابينداکي يئکه پيشيگين ضربه‌‌سيندن يئره سره‌له‌نن آلا- بولا پيشيک، پوز دستگاهي‌نين تونلانيب سينماسيني آنلارکن، گوجونو ديشينه ييغيب، جن کيمي يئردن قالخيب، قاچماغا باشلادي…!Arazazarbaijzn.anadilimiz@gmail.com