آختاردیغیمی تاپدیم
علیرضا ذیحق
آنادیلیمیز: لاپ او اوشاقلیق دان گؤزل لی یی سئوردیم.
آینایا باخارکن، دولغون ساچلاریم و گؤی گؤزلریم منه گؤزل اولدوغومو آنلاداردیلار. یئنی یئتمه یاشلارین دا ایسه بو دویغو ائله من ایله وار ایدی .
باشقالاری دا گؤزللیییم دن دانیشارکن، غرور لانیردیم و اؤزوم باشقا کیمسه نی سئومیردیم .مفتون لو باخیش لار دا کی کوچه بازاردا منه گؤزتیکیردیلر، منی داها چوخ غرور لاندیریردیلار.
راحات بیر زیندگانلیغیم وار ایدی. خوشبخت ایدیم. کئفی ساز بیر عائیله ده کی آتا آنام تحصیل آلمیش اینسانلار ایدیلار گونوم کئچیردی. بوتون آرزولاریما ایسه راحاتلیقلا چاتیردیم. تاکی گنج لیک چاتدی وچوخلی آداملار بیله مه ائلچی دوردی.
آمما هامیسینی او ماهانا ایله کی درس اوخویورام باشیم دان رد ائله دیم . دوزون سوروش سانیز من دئییل دیم کی اونلارا یوخ جاوابی وئریر دیم بلکه غروروم ایدی. آزدئییل دیلر جوان اوغلانلار ی کی دوزگون ایش لری وارایدی و تانینمیش عائیله لردن ایدلر . رویالاریم دا بیر کیشی یه فیکیر له شیردیم کی گرک منی سیتاییش ائده و ائله بیله مه عاشیق اولا کی اوننان چوخ مومکون اولمایا. هابئله بیر کیشی کی پول ایچینده اوینایا و اؤز حیات طرزی ایله، دیللرین ازبری اولا.
آتا آنام بعضن منی زورا قویوب و ائلچی لرده اولان نجابت واصالته گؤره ایستیردیلر کی اونلارین بیری نن ائوله نم. آمما من لج ائدیب کوسوردوم و اونلارداقاش قاباغیمی گؤرن کیمی من دن ا َل چکیردیلر.گرک کی رویالاریمین کیشی سینی تاپاردیم .بیرکیشی کی منی آرزولاریما یئتیره بیلردی . او آرزولار کی تکجه بول پول ایله اونلارا چاتماق اولاردی .
تاکی اوگون گلیب چیخدی و قوهوم لارین بیری نین تویوندا، آختاردیغیم کیشی نی تاپدیم . گؤزلری نین اسیری اولدوم. او گؤزلر کی پرستیش قَدَر منه باخیب توموردولار. ائله یوموشاق و شیرین دیلی وارایدی کی منی تعریف تمجید ائدن کیمی، مغرور لاشیردیم .ییرمی بئش یاشیندا بیر جوان کی فرانسه ده یاشاییردی و مهندیس ایدی.
بو تانیش لیق عشقه ختم اولدی و من سئوینیردیم کی آخیردا آرزوما چاتیب و یئنی بیر حیات باشلایا جاغام. بیزیم تانیش اولوب ائولنمه میز بیر آی دان چوخ چکمه دی وتا اؤزومو تاپام گؤردوم اوچاق دا یام و اوزاق بیر یوردا اوچورام .
ایکی ایله قَدَر بیزیم حیاتیمیز دوغرودان دا شیرین ایدی و اؤزومو بختیار سانیردیم .خارجی دیل لر کیلاسینا گئدیردیم و یئنی دوسلار تاپمیشدیم .بیر نئچه سفر ده ایتالیا، آلمان، سویس و اسکاتلنده گئتدیک . دونیا بوتون گؤزللیک لری ایله اوزومه گولوردی و اؤزومو لاپ خوشبخت حیس ائدیردیم. اریمین ده هم بوللو گلیری وارایدی هم بوش واختی کی ائده بیلیردیک باشاردیق جا گزیب دولاشاق .
آمما بیر زاد دا یارا کیمی دوشموشدو جانیما و منی ایچری دن یئییردی. حیات یولداشیم هئچ ایسته میردی اوشاغیمیز اولا .اوّل لر اؤزومه آلمیردیم و دئییردیم شاید ایستیر بیر ایکی ایل کئچه. آمما بیرگون ایسته مه دن حامیله اولدوم و اریمه آچیقلارکن، قفسدن قاچمیش دلی لر کیمی، سیلله تپیک ایه دوشدو جانیما . اوزگؤزوم گؤیه ریب قانییارکن، تازا آنلادیم نه جور بیر آدام لا یاشاییرام .
بو مسئله دن سونرا ایصرار ائله دی کی اوشاغی سقط ائدیب سالام ودئدی :” هله تئز دی کی اوشاغیمیز اولا و بوتون دیلخوش لوق لاریمیز ی الدن وئره ک. آدتم گرک مسؤولیتدن قاچا .”
شیرین حیاتیمیز گئتدیک جه آجی یا چالیردی و من ده لج ائدیردیم. اوشاغیمی ایستیردیم ساخلایام و بو آرادا مجبور قالدیم پلیسه باش وورام . قانون منه حق وئردی کی اوشاغیمی سقط ائتمه یم آمما منله حیات یولداشیمین رابیطه سی گئتدیکجه کورلاندی. پاریس بوتون گؤزللیک لریله منیم گؤزوم ده چیرکین له شیردی و هر آن قاچماق فیکرینده یدیم. تاکی بیرگون یوک یاپیمی باغلادیم و قاییتدیم ایرانا.
ایکی آی سونرا اوشاغیمی دوغوراجاغام و دوغماق همی، شاید بوشانام. گله جه ییم نه سایاق اولاجاق بیلمیرم. آمما چوخ بَتَر پئشمانام. غروروم منی بوغوب محو اولماغا سوروتده میشدی. اریم تیلفون آچیب باریشماق ایستیردی وادا اوصول لارین نان پئشمان ایدی . آمما کئچمیشه قاییدیب اونون ویریب سیندیرمالارینی نظردن کئچیردن کیمی ، گؤیلوم ایسته میردی بیله سی نن باریشام. او تیلفون لارین دا دئییری:
” کئچه نه گوذشت دییه رلر و چالیشاجاغام سنه و اوشاغیما مهربان اولام .”
ایندی هئچ بیر تصمیم توتمادان گؤزله ییرم کی حامیله لیک گونلرینم بیته و اوشاغیمی دونیایا گتیرم . سونرادی کی گرک فیکیرله شم و گؤرم نئیله ییرم
نوشته شده توسط admin در چهارشنبه, ۲۹ فروردین ۱۳۹۷ ساعت ۱۲:۰۸ ب.ظ
