ايلک آدديم
ايلک آدديميازان: يگانه_کريم‌زاده کؤچورن: تانسو_خياوي آناديليميز:معاشي‌ني دمير قوطودان آلسا دا “ساغ اول” دئييب، پولو چانتاسينداکي پول‌قابينا يئرلشديريب، يولونا داوام ائتدي. ايچينه دولان سئوينجين سببي‌ني آنلاماسا دا، آدديم‌لارينداکي راحاتليق، خوش هاوانين جييرلرينه دولان يونگول‌لويوندن اوزونه تبسّوم قونموشدو. آرادا دايانيب، باشيندان سوروشن آغ ايپک يايليغي‌ني دوزلديب، پالتوسونون ياخاسيني بير داها چکيب، سيغال‌لاييب، يولونا داوام ائتدييي واخت قولاغينا گلن تانيش سس اونو ساخلادي. دايانسا دا، گئري دؤنه بيلمه‌دي، اوزو ده‌ييشدي، سانکي بير آنين ايچينده ايل‌لرين اوستوندن قوش کيمي اوچوب، تنگ‌نفس يئره ائندي. – سَـريه، سن‌سن؟.. سـريه گئرييه دؤندو، گؤزلري قارشي‌سيندا دايانان آدامين سسي دوغما اولسا دا، اؤزو ياد ايدي. سس يئنه سـريه‌ني اؤزونه قايتاردي. – تانيمادين مني؟.. سـريه آداما ساري قورخاق آدديم‌لارلا گئديب گؤزلريني قيييب اونا باخير، سانکي کئچميشيني او اوزون قيريش‌لاري آراسيندا آختاريردي. – طاهير؟!. – هه، آي قيز، صينيف يولداشين طاهير! سـريه‌نين الي اؤز اوزونده گزدي. بير آندا دوشوندو کي، گؤره‌سن، سونونجو دفعه گوزگويه نه واخت باخيب. طاهير اونون ناراحات‌ليغيني باشا دوشدو، يا يوخ، بيلينمه‌دي، آما دئدي: – هئچ ده‌ييشمه‌مي‌سن سـريه، – سؤزو ايله قادين اليني اوزوندن چکيب سئوينجله کيشي‌يه باخدي. – طاهير، باکي‌دا ياشاييرسان؟ – يوخ، آي سـريه، اوشاق يارالانيب خسته‌خانادا ياتيبدي. – هانسي، بؤيويون؟ – يوخ، سنين قيزي‌نين اَکيزتايي… دئييب، گوجله گولومسه‌دي: – قيزين نئجه‌دي، اَره وئرمه‌مي‌سن؟ – يوخ هله… – نييه، رحمت‌لييين قيزي، اوتوزو حاق‌لاديلار، بيزيمکي ده ائولنمه‌دي، دئيير خوجالي‌ني آزاد ائدک، تويومو اوردا ائده‌جم. سـريه‌نين گؤزلري دولوب، سسي تيتره‌يه- تيتره‌يه: – انشاللاه، قونشو، انشاللاه. منيم قيزيم بؤيومه‌دي آخـي. طاهير سـريه‌نين گؤزلرينه باخدي، ايندي نسه آنلاسا دا، دانيشماغا گوجو يئتمه‌دي. سـريه اونون قولوندان توتوب، اوشاق پالتارلاري ساتيلان دوکانا ساري چکدي. طاهير سسسيزجه اونون بؤيرونه دوشوب گئديردي. سـريه دوکانا گيرندن سونرا، طاهيري اوردا اونو گؤزلمه‌سيني تاپشيريب اؤزو ايچري ساري گئتدي. سـريه گئري دؤننده او اؤزونو توخ توتوب قادين‌ين اونو هارا آپاراجاغيني، نه ائده‌جه‌ييني گؤزله‌ييردي.ياتاق‌خانايا اوخشار کؤهنه بينانين قاپي‌سيندان ايچري کئچيب، اوچونجو مرتبه‌يه قالخديلار. قاپي آچيلاندا طاهيرين ايلک گؤزونه دمير چارپايي، اونون اوستونه سيرا ايله دوزولموش اوشاق آياق‌قابي‌لاري ده‌يدي. سـريه ايره‌لي کئچيب، اونو ائوه دعوت ائديب سئوينجک چانتاسيندان يئني اوشاق آياق‌قابي‌سيني چيخارديب، ياتاغين اوسته قويوب، چايين آلتيني يانديرماغا گئدنده طاهيرين غفيلدن يادينا دوشدو کي، بو گون خسته‌خانادا يارالي ياتان اوغلونون دوغوم گوندو، دئمه‌لي سـريه‌نين ده قيزي‌نين دوغوم گونو ايدي. سـريه بالاجا ماسانين اوستونه قند، مربا دوزوب، چايين قايناماغيني گؤزلمک اوچون طاهيرله اوز- اوزه اوتوروب، – بو گون اوشاق‌لاريميزين دوغوم گونودو، سنينکي خسته‌خانادا، منيمکي ايسه… سـريه ال‌لري ايله اوزونو توتوب هؤنکوردو. طاهير اونا باخيب، آجي- آجي آغلادي، اوزونو توتمادان، گؤز ياشيندان اوتانمادان: – نه واخت سـريه، نه واخت؟.. دئدي.سـريه اليني اوزوندن چکمه‌دن: – دور آياق‌قابي‌لاري ساي… – دئدي. طاهير اوتوردوغو يئردن آياق‌قابي‌لاري سايديغي واخت سـريه اوزونو سيليب، چاي دمله‌مه‌يه دوردو، سانکي اؤز- اؤزونه دانيشيردي – ياديندادي، “سعادت” ديل آچماميشدي، آما هله چتين يئريييردي. حکيم دئميشدي، بير آز گئج يئرييه‌جک، آما يئرييه‌جک. اوشاق آياق‌قابي ايسته‌ييردي بيزدن! رحمتليک آتاسي هر دفعه دئييردي، معاشيمي آليم، قيزيما آياق‌قابي آلاجاغام… سـريه چاي سوزدو، طاهيرله اوز- اوزه اوتوروب، گؤزلريني الي ايله سيلدي. – بيليرسن، اوشاق يئريدي. طاهيرين گؤزلري ايشقلاندي، قيزارميش گؤزلرينده‌کي اوميدله سـريه‌يه باخدي. سـريه چئويريب آياق‌قابي‌لارا باخدي، طاهيره ساري چئويريلدي: – يئريدي. خوجالي‌دان قاچديغيميز گئجه آتاسيني ووردوقلاري واخت اونو يئره قويدوم، آتاسيني توتدوم. بير ده گؤردوم “سعادت”يم بيزي قويوب گئري گولـله آتيلان طرفه گئدير، آياق‌لاري آتاسي‌نين قانينا بولاشميشدي، قارين اوسته يئريديکجه، قانـلي آياق ايزلري يئره هوپوردو. بيز بئله عهد ائلمه‌ميشديک آخـي. من اوشاغا چاتانا کيمي اونو دا ووردولار ائرمني‌لر… طاهيرين يوموروغو سيخيلسا دا، اونو هارا ووراجاغيني بيلمه‌دن دوروب، بو ائودن نئجه چيخديغيني بيلمه‌دي. تئلفونو سوسماق بيلميردي، جاواب وئرمک لازيم دئييلدي، تئلفونو آچماق بس ائديردي خبري زنگ ائدن اؤزو وئره‌جکدي. او خبر آرتيق بتشقا حکايه يازاجاقدي. شهيدين وار، طاهير کيشي!! قار ياغير. سيز قار اوستونه يازيلان قانلي آياق ايزلري گؤرموسونوز؟! ايندي او، هئچ واخت بؤيومه‌يه‌جک، يالين آياق‌لاريني هئچ واخت گئيمه‌يه‌جک… اييرمي دوققوز آياق‌قابي‌سي وار ايدي… سون Arazazarbaijzn.anadilimiz@gmail.com
تاریخ: 1403/05/20 08:07 ق.ظ | دفعات بازدید: 70