یا ابا عبدالله سنین گونونه تای گون اولماز
اکبرسعادت
دئدى یا رب بویاندیم قانه قرآن مبین قالسین
جهاندا حشرهجن آئین ختم المرسلین قالسین…
تشیّع اولماسین فانى، فنا دنیاده، دین قالسین
که من جانباز راه عشق و ایمانم… حسین جانم
آنا دیلیمیز:سلام اولسون سنه ائی عبا عبدالله…. سلام اولسون سنه ائی الله هین سئچیلمیش اوولادی. سلام اولسون سنه ائی اللهین سئچدیگی و سئچدیگی‌نین اوغلو. سلام اولسون سنه ائی مومینلر امیری‌نین اوغلو و ائی وصیلر آغاسی‌نین اوغلو…. سلام اولسون سنه، ائی عالم خانیم لارین، خانیمی فاطمه‌‌نین اوولادی. سلام اولسون سنه ائی اللهین اینتیقامینی آلان و ائی اللهین اینتیقامینی آلانین اوغلو. ائی اوکس کی کومکچیلری‌نین هامیسی شهادته یئتدی و سنین اینتیقامینی آلماق اوچون بیر کس قالمادی…
حسین (ع)…….آزادلیق مکتبی نین بیناسی…
ایمام حسین (ع) بویوروب: منیم قییامیم امر به معروف (یاخشی ایشلره دعوت) و نهی از مونکر (پیس ایشلردن چکیندیرمک) اوچوندور. بابام رسولی اکرمین، آتام امیرالمؤمینین علی(ع) یولونو گئتمک، بابامین اوممتینی اصلاح ائدیب فسادی آرادان قالدیرماق اوچون قییام ائدیرم…
کربلادا باش وئرن قانلی فاجعه‌‌نین موسلمانلار اوچون بویوک نتیجه‌لری اولدو. ایمام حسین کیچیک بیر دسته ایله بویوک بیر شر لشکرین قارشیسیندا “یوخ” دئمه‌یی باجاردی.
ایمام حاق مقابلینده، ایسلام مقابلینده موباریزه‌یه قالخدی، بو یولدا مالیندان، جانیندان کئچدی، ان یاخین سلاحداشلارینی ایتیردی عائله‌سی‌نین اسیر دوشمه‌سینه راضی اولدو لاکین اوز عقیده‌‌سیندن دونمه‌دی….او، آزادلیق مکتبی‌نین بیناسینی قویدو و اوز قانییلا ابدی اولاراق آزادلیق سئور اینسانلارین قلبینه آزادلیق توخومونو سپدی. بلکه ده، تاریخده ایلک دفعه اولاراق مغلوب ائدن دئییل، مغلوب اولانلار قلبه چالدیلار. بو قییام هر گون، هر یئرده اینسانلارا ظولمون، حاقسیزلیغین مقابلینده “یوخ” دئمه‌یی اویرتدی. نه قدر کی، یئر اوزونده ظولم عدالتسیزلیک، حاقسیزلیق وار، ایمام حسین مکتبی اوز گوروین ایتیرمه‌یه‌جک. هیجرتین ۶۱ جی ایلینده باش وئرن حادیثه ائله بیر حادیثه دیر کی ایسلام دونیاسینی و داها گئنیش، اینسانلیق دونیاسینی جومدوغو یوخودان اویاتدی.او گون بیر نفر چیخدی کی دئسین اینسان حق یولوندا هر زادین قوربان وئره بیلر و حقیقتی بیان ائله‌مگه هئچ بیر شئی مانع اولا بیلمز…
اربعین دیر و بیر عشق گونو دور بو گون(محرم گونلری کیمی) عاشقلرین قانی جوشه گلیب و اوز ارادتلرینی »گوزیاشلار شهیدی« و »سوسوز جان وئرن« مولالرینه گوستردیلر….کربلا شهیدلریایله پیمان باغالادیلارکی دین و اسلام یولوندا باش و جاندان کئچسینلر و امام حسینین یولونون دوام ائدنلریندن اولسونلار..ریوایتلر اساسیندا ظولمون تعریفی بئله‌دیر: »وضع الشی فی غیر موضعه« یعنی بیر شئیی اوز یئریندن کنار بیر یئره قویماق. بو سوز »عدل« سؤزونون موقابیلینده دایانیر کی هر زادی اوز یئرینه قویماق معناسیندادیر…قورآن و ریوایتلر اساسیندا ظولم اوچ دنه کلی یئره بولونور کی بونلارین هر بیری آیری شاخه‌لره بؤلونورلر. نهج‌البلاغه‌نین ۱۷۶ جی حیکمتینده بئله گلیب: بیلین کی ظولم اوچ جوره‌دیر:
۱٫ باغیشلانمایان ظولم، ۲٫ او ظولم کی آللاه طرفیندن سورقو سوآلا چکیله‌جک ۳٫ باغیشلانان ظولم. آما باغیشلانمایان ظولم، آللاها شریک قرار وئرمکدیر نئجه‌کی بویوروب (آللاه [هئچ‌واخت] ظولمو باغیشلامایاجاق) و باغیشلانان ظولم او ظولمدور کی اینسان بیر سئری خیردا گوناهلارا مورتکیب اولماقلا اوزونه ائلر. آما او ظولم کی آللاه طرفیندن سورقو سوآلا چکیله‌جک ، او ظولمدور کی جماعت بیر بیرینه ائدیر.« بو زینب کبری (س) ایدی که حسینی عیزتین مونادیسی ایدی کی و شوجاعت و دوزومله، حسینی حماسه‌نی تاریخده همیشه‌لیک قالارگی ائله‌دی.دونیادا سایسیز قیاملار و اینقیلابلار اولوب آما اونلارین چوخ آزی اثر قویان و قالارگی اولوب کی اونلارین مهمی اباعبدالله الحسینین(ع) عاشورایی نهضتی دیر…بو بویوک واقیعه‌نی هئچ کس اهل بیت(ع) مخصوصاً سیدالساجدین(ع) و بنی هاشم عقیله‌سی زینب کبری(س) کیمی اوز اودلی و فصاحتلی خوطبه‌لری ایله جماعتی تأثیر آلتینا آپاردیقلاری کیمی، تبلیغ ائلیه بیلمزدی.
شکسیز عاشورایی اسیر کاروانی‌نین، تبلیغی نهضتینده، حضرت زینب(س) و امام سجادین(ع) قالارگی تأثیرلری واریدی.بو موحترم بانونون کوفه شهرینده‌کی خوطبه‌سی اموی‌لرین کربلادا‌کی حیاسیز جنایتلریندن پرده گوتوردو و اونلارین یالانچی و ریاکار و ظالیم اولدوقلارینی آشکار ائله‌دی. هابئله کوفه‌لیلرین وفاسیزلیقلارین و گله‌جکده‌کی آجی گونلرینی آیدینلاتدی. اونلاری مونقلیب ائله‌دی و ظولم دستگاهی‌نین پایالارینی تیترتدی.
امام حسینه توکولن گوز یاشلاری:بیر گون بیر شخص امام صادق (ع) دان سوروشدو بو ریوایت کی بویورور: ایمام حسینه (ع) گوز یاشی توکه‌نین یئری جنّتدیر، نه دئمکدیر. آخی من ائله‌لرین تانیرام کی هم ایمام حسینه آغلاییرلار و هم ده ائله گوناهلار ائدیرلر کی اوخشامیر اونلارین یئری جنت اولسون.او حضرت جوابیندا بئله بویوردولار کی بیری ایسته‌سه او مقاما یئتیشه کی ایمام حسینه آغلایا، گرک بوتون عمللری آللاه دئیه‌ن و ایمام حسین دئیه‌ن اولا. یوخسا ریاکارلیق و تزویردن توکولن گوز یاشلاری ایمام حسینه آغلاماق ساییلماز. کربلا تورپاغی نین فضیلتی:امام حسین(ع)ین تربتی پیغمبرین محبوبو، جنت جوانلارینین آغاسی… بو تورپاقدا دفن اولوندوغو اوچون اوز مقدسلیگی ایله فرقلیدیر و اونلاردان فضیلتلی حساب اولونور.بو تورپاق، ائله بیر شخصی اوز قوجاغینا آلمیشدیر کی او، جدی حضرت محمد(ص)ین دینینی حفظ ائتمک، ظلم و عدالتسیزلیگه سون قویماق و آزادلیق آدیلا اؤز قوهومو ایله زمانه سینین ظلمکار خلیفه سینه قارشی عصیان ائدیب، بو یولدا شهیدلیک شربتینی ایچمگه نائل اولموشدور.بو تربت بشریته آللاه یولوندا فداکارلیق و رشادت درسی وئریر و انسانلارین ذهنینده، تاریخده میثلی گورونمه ین خاطره لری جانلاندیریر.
اما مهربان دوستلار… بو ایش ستایش اوچون دئییل، اصلینده انسانیته، آزادلیغا، آللاه یولوندا فداکارلیغا، ظلم و عدالتسیزلیگله مبارزه یه وئردیکلری اهمیت اوچوندور. بوتون بونلارلا یاناشی قید ائتمک لازیمدیر کی ایستر سنی، ایستر ده شیعه مذهبینین معتبر منبعلرینده، امام حسین(ع)ین تربتینین فضیلتی حاققیندا بیر چوخ حدیث و روایت نقل اولونموشدور.فرض ائدک پیغمبر(ص)دن بو باره ده بیر روایت ده نقل اولمامیشدیر. یاخشی اولمازدی کی بو تربت اوستونه سجده ائدک؟ چونکی امام حسین(ع)ین تربتی ایری تورپاقلارا گوره بویوک فضلی وار. بئله سیله امام حسین(ع) همیشه بو شخصین ذهنینده و یادیندا قالار و اوندا اولان خیر و برکتلردن فایدالانار.
یاددان چیخاردمایاق کی:او حضریتین زیارتینی بو گون اوخوماغا فضیلتین چوخ اولماسینا موتَواتیر حدیث وار و اگر بیر نفر توفیق تاپا بو گون او حضرتین موقدّسه قوبّه‌سی‌نین آلتیندا اولا، ثوابی عرفاتدا اولاندان آز اولمایاجاق.الهی ایمام حسین (ع)این شفاعتینی تک به تک بنده لری ین قیسمت ائت. بیزلری اوز درگاهیندا حسین (ع) و اونون صحابه‌لری ایله بیرلیکده، عملی صالح،اوجا مقاملی، حقیقت آختاران، ثابت قدم ائت… ائله صحابه‌لر کی، اوز روحلارینی، یاخود قلبلری‌نین پاک قانلارینی حسینه (ع) فدا ائتدیلر.
نوشته شده توسط admin در چهارشنبه, ۲۶ آبان ۱۳۹۵ ساعت ۵:۵۳ ق.ظ
