اصلان ایله انسان نغیلی

چئویردی: #سما
آنادیلیمیز:بیری وار ایدی بیری یوْخ ایدی، آللّه‌دان سووای هیچکیم یوْخ یدی
بیر گون بیر اصلان اوْرمانین میدانیندا اوْتورموش اوشاقلاری‌نین اوْیناماسینی سِیر ائدیردی. بیردن گوردو میمونلارلا چاققاللار قاچ ها قاچدادیرلار. اصلان سوْروشدو: “نه اوْلوپ نه خبردی؟” دیدیلر: “هیچنه، بیر انسان اوْرمانا ساری گلیردی، بیز ده قوْرخدوق”.
اصلان اوز اوزونه دوشوندو انسان چوْخ بویوک حیواندیر هلبت. اوْ بیلیردی زوْرو هامییا چاتار بونا گوره ده حیوانلاری دیله توتاراق دئدی:-انسانین قوْرخوسو یوْخدو کی!
دئدیلر:”دوزدور قورخوسو یوْخدور، قوْرخماق یاخشی دگیل آنجاق سیز بو گونه کیمی انسانلارلا قارشیلاشمامیسیز، انسانلار چوْخ قوْرخمالیدیرلار، زوْرلاری دا هامیدان چوْخدور.”.
اصلان قاهقاها چکیپ گوله‌رک دئدی:-آرخایین اوْلون! انسان نَدیر کی؟ دئو ده گلسه من بورادا اوْلدوغوم سوره‌جه هیچنه‌دن قوْرخمایین!
اصلان اوْ زمانا کیمی اوْرماندا ائشیگه چیخمامیشدی و عمرونده انسان گورمه‌میشدی. فکرلشدی میمونلار و چاققاللاردان انسانین نه اوْلدوغونو سوْروشسا آبروسی گئدر. بو اوزدن ده هیچنه دئمه‌دی. اوز اوزونه دئدی یارین گئدرم اوْ قدر آختاراریپ انسانی تاپارام سوْنرا دا لَشینی گتیررم آتارام بورایا کی حیوانلارین قوْرخوسو توکولسون.اصلان صباحیسی گون تکباشینا چوله ساری یوْلا دوشدو. گئتدی گئتدی گئتدی… یئتیشدی بیر فیله. دئدی هلبت قوْرخمالی انسان دئدیکلری بودور. بو یئکه‌لیکده اندامی اوْلان حتماً انساندیر. قاباغا گئدیپ سوْروشدو:
-منه باخ گوروم، انسان سن‌میسن؟فیل دئدی:-یوْخ بابام، من فیلَم. من اوزوم انسان اوْغلونون الینده جانا گلمیشم. انسانلار گلیپ فیللری توتورلار. بئلیمیزه تخت باغلیرلار و اوْنا مینیرلر. سوْنرا چکیش ایله باشیمیزدان دویورلر. آیاقلاریمیزا زنجیر باغلیرلار یا دا دیشلریمیزی سیندیریرلار و مین جور بلا باشیمیزا گتیریرلر. من هارا انسان هارا…
اصلان دئدی:-چوْخ یاخشی، اوزوم بیلیردیم، دئدیم گوروْم بیردن بئینیوه وورماسین انسان آدی قوْیاسان اوزووه!
فیل دئدی:-اختیاریز وار اصلان جنابلاری، بیز غلط ائیله‌ریک انسان آدی اوستوموزه قوْیاریق.
اصلان دئدی:-یاخشی سوزو اوزاتما، چیخ گئت ایشیوین دالیسیجا!
اصلان بونو دیییپ گینه یوْلا دوشدو. گئدیپ گئدیپ بیر یئکه دَوه‌یه یئتیشدی، دئدی بلکه انسان بودور. چاغیریپ سوْروشدو:
-دایان گوروم! سن انسانسان‌می؟
دَوه دئدی:-آللّه ائیلمه‌سین من انسان اوْلام. من دَوه‌یم، تیکان یییپ یوک داشییارام. من اوزوم انسان الینده اسیر و ذلیلم. گلیپ یوز باتمان یوک چاتیرلار چیگنیمه، آج- سوسوز قوراقلیق چوللرده منی دولاندیریرلار. سوْنرا دا ال آیاغیمیزی زنجیرله‌ییرلر کی قاچمایاق. انسانلار بیزیم سوتوموزو ایچیرلر، یونوموزو قیرخیپ عبا- قبا دوزلدیرلر، گینه یقه‌میزده ال گوتورمورلر، اتتیمیزی بیله یییرلر.
اصلان دئدی:– چوْخ یاخشی، من اوزوم بیلیردیم بونلاری.ایسته‌دیم گورم اوْلمایا آدیوی انسان قوْیوپ میمونلاری، چاققاللاری قوْرخوداسان بیردن.
دَوه دئدی:-بیز آنلاماریق آدیمیزی انسان قوْیاریق. منیم هیچکیمه آزاریم گئچمز. میمون یا چاققال بیله اوْوساریمی چکسه‌لر اوْنلارین یانیجا گئدرم. من زحمت چکن بیر حیوانام.
اصلان دئدی:-یاخشی دا، چوخ دانیشما، چیخ گئت ایشیوین دالیسیجا!
اصلان بونو دیییپ گینه یوْلا دوشدو. گئتدی گئتدی بیر اینَگه یئتیشدی. اوز اوزونه دئدی “بو حیوان اوْ بوینوزلاریله حتماً انساندیر”. گئچدی قاباغا سوْروشدو: -سن انسان عایله‌سیندنسن؟ اینک دئدی: -یوْخ قربان، انسانین بوینوزو اوْلماز کی. من اینَگم. اوزوم ده انسانلارین الیندن جانا گلمیشم، بیلمیرم ده هارا گئ?یم کیمه شکایت آپاریم! انسانلار بیزلری توتوپ گئجه‌لری طویله‌یه باغلیرلار، گوندوزلری اکین یسرلرینه آپاریرلار و بیزی مجبور ائدیرلر یئری شُخوملایاق، خرمن بیچک، عصّارلیق چرخینی فیرلاداق. سونرا سوت ده وئرک، آخرده ده بیزی اولدوروپ اتتیمیزی یییرلر. اصلان دئدی:-بلی اوزوم بیلیردیم، دئدیم اوْلمایا بیردن باشیوا ویرا انسان آدی قوْیاسان اوزووه و کیچیک حیوانلاری قوْرخوداسان. چونکی بو میمونلار، چاققاللار انساندان قوْرخارلار.
اینک دئدی:-یوْخ قربان، موضوع بوجور کی من بو بوینوزلارلا…
اسلان سوزونو کسدی کی:-یاخشی یاخشی، چوْخ دانیشما، چیخ گئت ایشینه!
اصلان اوز اوزونه دئدی:”بس بللی اوْلدو انسانین بوینوزو یوْخدور. و یوْلونا دوام ائیله‌دی. گئدیپ یئتیشدی بیر
اوزون قولاغا. اوزون قولاق دوردنعل چولده قاچیپ باغیریردی. اصلان بیر آز اوْنا باخیپ دئدی: بو قاچیپ باغیران حیوان یقین منیم آختاردیغیمدیر. اوزون قولاغی چاغیریپ دئدی:
-آهای منه باخ گوروم! انسان کی دییرلر سنسن؟اوزون قولاق دئدی:-یوْخ اوز جانیم ایچون! من انسان اوْلامام. من اوزوم انسان الیندن یازیق اوْلموشام. ایندی ده ائله انسان الیندن قوْیوپ قاچمیشام. اوْنلار چوْخ قوْرخمالیدیرلار. اللری بیر حیوانا بند اوْلسا، داها یقه‌سیندن ال چکن دگیللر. بیزی توتوپ یوک قوْیورلار بئلیمیزه. اوزلری مینیرلر بیزه، بیزی ده اله سالیرلار. دییرلر اوزون قولاق اوْلان یئرده پیاده گئتمیه‌سن گرک. بعضاً چوْخ آجیماسیز اوْلورلار.
اصلان دئدی:-یاخشی یاخشی، اوزون قولاق اوْلدوغونو اوزوم بیلیردیم. من گئدیرم گورم انسانلارین سوزو نَدیر.
اوزون قولاق دئدی:-آنجاق، قربان چوْخ اوزوزدن مواظب اوْلون!
اصلان دئدی:-یاخشی، دا اوزون دانیشما، گئت ایشیوین دالیسیجا. من نئیلیه‌جگیمی بیلیر.
آنجاق اصلان چوْخ تعجب ائدیردی. بس بو انسان نه‌جور بیر شیءدیر، آخی فیلدن، دَوه‌دن، اینکدن، ائششکدن داها بویوک حیوان دا اوْلار می؟ بیر آز دا گئتدی بیر آتا یئتیشدی. آتی آغاجا باغلامیشدیلار، آغزینا دا توْربا باغلامیشدیلار توْربادان آرپا یییردی. اصلان ایلَری گئدیپ سوْروشدو:-سن کیمسن؟ من انسان آختاریرام.
آت دئدی:-سوس! یاواش دانیش انسان ایشیدر. اوْ تهلکه‌لیدیر. تکجه سن بیزیم انتقامیمیزی اوْندان آلا بیلرسن. انسانلار بیزی توتورلار، بیزه اوْوسار باغلاییرلار، بیزی ساواشلارا آپاریرلار، اوْوا آپاریرلار، بیزه مینیپ بیزی قاچیردیرلار، دَده‌میزی یاندیریرلار. باخ نئجه منی آغاجا باغلاییپلار!