حق آلان احمد و حق وئرمز احمد

 گونلرين بير گونونده، ايکي احمد عمي وار ايدي. بيري »حق آلان احمد عمي« ايدي، بيري »حق وئرمه‌ين احمد عمي«!
حق وئرمه‌ين احمد عمي‌نين، بير عباسي حق آلان احمد عمي‌يه بورجو وار ايدي. بو حق آلان احمد عمي، نئچه دفعه بورجونو ايسته‌ميشدي، بو وئرمه‌ميشدي. چوخ يوبانميشدي! بير گون حق آلان احمد عمي بيکار ايدي، اؤز- اؤزونه دئدي: »دوروم گئديم حق وئرمه‌ين احمد عمي‌دن بير عباسي‌مي آليم.« حق آلان احمد عمي، اُلاغين مينيب، بو کند، او کند، گئتدي يئتيشدي حق وئرمه‌ين احمد عمي‌گيله… حق وئرمه‌ين احمد عمي، اوستدن پنجره‌دن باخيردي. گؤردو واي دده، بو حق آلان احمد عمي‌دي! خانيميسينا دئدي کي:– دئنن گئديب سفره، چيخيب گئتسين. منه دئيرلر حق وئرمه‌ين احمد عمي!
حق آلان احمد عمي قاپيني دؤگدو. خانيمي‌سي گلدي قاپييا. دئدي:– بلي؟!
حق آلان احمد عمي دئدي:– منم، احمدين قارداشي.خانيم قاپيني آچيب، دئدي:– احمد عمي! قارداشين گئديب سفره، معلوم دگيل بير آي چکر، اون آي چکر، ائوده دگيل!
حق آلان احمد عمي دئدي:– نه ائله‌يک! اؤزو ائوده دگيل، ائوي کي، ائوده‌دي!
اؤزو، اؤزونو قوناق چاغيريب، گئچدي حيطه. آپاريب الاغ‌ين باغلادي طويله‌يه، اؤزو ده، اوتوردو چايدان، سودان ايچيب، سرينلدي، دوروب دئدي:– زن‌داداش!دئدي:– بلي!دئدي:– کولونگ وار سيزده؟دئدي:– نييه يوخدور، بويور! نه ائديسن؟
دئدي:– لازيميمدي.گئتدي باشلادي طويله‌ده بير آخير قازماغا! حق وئرمه‌ين احمد عمي‌نين، خانيميسي گئتدي گؤرسون بو نه ايش گؤرور طويله‌ده! گؤردو بيردانا آخير قازير! دئدي:– احمد عمي، آخيري نئيليسن؟ آخير واردي دا!
دئدي:– منيم اُلاغيمين بالاسي اولاجاقدي. قارداش دا، معلوم دگيل نه واخت گله، اون گون سونرا گله، بير ايل سونرا گله، ايکي ايل سونرا گله، اونون بالاسينا آخير قازيرام.
آرواد گئديب، دئدي:– کيشي! گل اؤزونو گؤرست، بونون بير عباسي‌سيني وئر گئتسين، بو هله ايندي، الاغينين اولماميشدان بالاسينا، آخير قازير! سنين بير عباسيندان اؤترو من نه قدر بونا چاي، ناهار، شام وئريم!
حق وئرمه‌ين احمد عمي دئدي:– بس اوجور! منه دئيرلر حق وئرمه‌ين احمد عمي! آخشام من گليم، گؤزه گؤرسنيم. اونونلا گؤروشنده، من اؤزومو چيرپارام يئره، اؤلرم يالاندان، سيز مني آپارين قويون مرده‌شورخانايا، يا کنددن ائشيگه! خلاصه بو گؤرسون من اؤلموشم، چيخسين گئتسين!آرواد دئدي:– ياخجي.
آخشام اولدو. حق وئرمه‌ين احمد عمي، قاپيني دؤگدو. خانيمي‌سي دئدي:– احمد قارداش! ائله¬بيل قارداشين گلدي، قاپيني دؤگمه‌سيندن تانيييرام.
بونلار دوردولار پئشوازينا، اؤپوش- گؤروش، حق وئرمه‌ين احمد عمي غش ائله‌ييب، اؤزونو يئره ووردو. خانيمي‌سي شيون سالدي»اي واي اريم، اي واي اريم!« بو ياندان دا، احمد عمي دئيير: »اي واي قارداشيم!«
حق وئرمه‌ين احمد عميني آخشام- آخشام يويوب، کفنلديلر، آپارديلار کنددن ائشيگه، قويدولار بيردانا پَيه وار ايدي، اونون ايچينه! دئديلر کي، صاباح آپاريب، بونو قويلاريق. خوش گلديز!!
حق آلان احمد عمي دئدي:– يوخ! من گئتمرم، من قارداشيمي هئچ واخت تک قويا بيلمرم.
بو سؤزو دئييب، گؤردولر چاره يوخدور، بو قالدي قارداشي‌نين يانيندا، دئدي:– من بوردا قاليرم، بيردن شيطان گلر بونون ايمانيني اليندن آلار!
احمد عمي گئچدي قديم پيه‌لرده صانديق اولاردي، گئچدي صانديغين ايچينه، صانديغي قويوبلار قبرين اوستونه!
گئجه‌نين بير ياريسيندا، قيرخ حرامي‌لر، بير خزانه کسيب، گتيريب بوردا بؤلوشوردولر. بونلار بؤلوشوب، قورتارديلار.
بيردانا ياخجي، قوّتلي قيلينج قالدي. او دئدي: »وئرين منه«، بو دئدي: »وئرين منه!« قيرخ حرامي‌باشي دئدي کي:
– هرکس بو تزه اؤلونو، بو قيلينجلا اورتادان بؤلسه، قيلينج اونوندور.دئديلر:– ائله اؤزون بؤل!
قيرخ حرامي‌باشي قيلينجي قالخيزيب ووراندا، حق وئرمه‌ين احمد عمي گؤردو، بير عباسي‌دن اؤترو جاني دا، گئتدي. قورخودان ياواشجا ايسته‌دي کي، او بيريسي احمد عمي‌ده اونا کمک اولسون! قيرخ حرامي‌باشي قالخيزاندا قيلينجي وورسون، بو ديبدن دئدي:– دوروم؟
او بيريسي احمد عمي کي، صانديغين قاپاغيني آزجا قالخيزميشدي باخيردي، دئدي:– دورماسان، بوين?و? ووروم.
بو قيرخ حرامي‌باشي‌نين قيلينجي قورخودان اليندن دوشدو يئره! بونلار هر زادي يئره قويوب، دئديلر:– قاچاق، اؤلولر خوتداييبدي، بو نه ايشدي!؟… قاچ کي قاچاسان…
احمد عمي‌گيل، ايکيسي‌ده دوردولار. شمع يانديريب، ايشيغيندا خزانه¬ني آرالاريندا بؤلدولر. دؤنوب حق آلان احمد عمي دئدي:– احمد عمي، منيم بير عباسيمي وئر!دئدي:– اوغلان!
بو قدر سني قيزيل، گوموش صاحيبي ائله‌ميشم، نه بير عباسي! منه دئيرلر حق وئرمه‌ين احمد عمي! وئرمييه‌جاغام.
او دا دئدي:– منه ده، دئيرلر حق آلان احمد عمي!
بونلار توتوشموشدولار، او ياندان قيرخ حراميلرين بيري دئدي:– آي بالا، بيز ائله بيردن قاچديق، من گئديم گؤروم اوردا نه خبر وار؟!
قاييديب، گلدي. باشيني اوزاتدي گؤرسون، نه خبردي، نئچه اؤلو دوروب؟!حق وئرمه‌ين احمد عمي گؤردو، بونون باشيندا قشنگ بير بؤرکو وار، بؤرکو گؤتوروب، چيرپدي حق آلان احمد عمي‌نين قاباغينا، دئدي:– گؤتور بو دا سنين بير عباسي‌ين! ال چک گؤرک!بو اليني ياخاسيندان چکدي. حرامي اونلاري گؤروب، قورخودان قاچ کي قاچاسان!..
گئتدي يئتيشدي يولداشلارينا. دئديلر:– نه خبر؟
دئدي:– دورمايين، قاچين.دئديلر:– نييه؟
دئدي:– او قدر اؤلو خوتداييب، او قدر اؤلو دوروب کي، او قدر خزانه‌ني بؤلموشدولر، بيرينه ده، بير عباسي يئتيشمه‌ميشدي، منيم بؤرکومو گؤتوروب اونا وئرديلر، قاچين، قاچاق.
بونلار قاچماقدان، احمد عمي‌‌ده بؤرکو گؤتوروب قويدو باشينا، خزانه‌ني ده اونون اوستونه، ايکيسي‌ده حق- حسابيني گؤروب، يئدي- ايچدي، مطلبينه يئتيشدي. آللاه سيزي ده، مطلبيزه يئتيرسين.