ائلدار موغانلي
آناديليميز: معاصر دونيادا، سلبريتيزم فئنومئني مرکب و چوخ شاخهلي بير مسئله اولاراق اينکيشاف ائتمکدهدير.
جمعيتين اجتماعي و تئخنولوژي دهييشيکليکلريندن تأثيرلنهرک، بو فئنومئن مدني و اجتماعي ساحهلرده داها چوخ گؤرونمکدهدير. بير طرفدن، تئخنولوژي اينکيشافلار و اجتماعي شبکهلرين يارانماسي، (مثلا: اينستاگرام، توييتر، فيسبوک، تلگرام، واتساپ و ساير پلاتفورمالار) بو فئنومئنين يارانماسيندا و ياييلماسيندا چوخ اؤنملي رول اويناميشدير؛ ديگر طرفدن ايسه، اجتماعي دهييشيکليکلر بو فئنومئنين اينکيشافيندا تاثيرسيز قالماميشدير. نتيجه اعتباريله، اجتماعي شبکهلر و دهييشيکليکلر يئني شؤهرت و سلبريتيزم فورمالاريني ياراتميش، فرديلييه و اؤزونو ايفاده ائتمهيه اولان ماراق داها دا آرتميش، اينسانلار حيات طرزلريني، خاريجي گؤرونوشلريني و گوندهليک فعاليتلريني آچيق شکيلده تقديم ائتمهيه داها چوخ مئيل ائتميش و بو دهييشيکليکلر نتيجهسينده مدني دهيرلر کئچيجي شؤهرت قارشيسيندا کؤلگهده قالميشدير.سون ايللرده ادبياتيميزدا باش قالديران و گونو-گوندن ده گئنيشلنمکده اولان »ادبي سلبريتيزم« فئنومئني دقته لاييق بير مسئله حالينا گليب چيخيبدير. بو فئنومئن بديعي و ادبي اثرلرين کئيفيتيندن و ائستئتيک گوجوندن داها چوخ، شؤهرت و اجتماعي شبکهلردهکي پوپوليارليغا اساسلانان موضوعلاري ميدانا آتيبدير. باشقا بير سؤزله، »ادبي سلبريتيزم« ائله بير حادثهيه چئوريلمکدهدير کي، بورادا بير سيرا يازيچي، شاعرلر و ادبيات ايشچيلري کيمي اؤزلريني تقديم ائدن اينسانلار، اثرلرينين کئيفيتي و درينليگي ايله دئييل، اجتماعي شبکهلرده قازانديقلاري شؤهرت و جلب ائديجيليک سايهسينده مشهورلاشير و ادبي مرجعلره چئوريليرلر. بو پروسئسده بديعي و ادبي معيارلار گئت- گئده اؤز يئريني اجتماعي شبکهلرده ايزلهييجي سايي، بهينمه(لايک) اعتباري و گوندمده قالما باجاريغي کيمي گؤستريجيلره وئرير.
بو مسئلهيه دقت ائتمک اونا گؤره اهميتليدير کي، »ادبي سلبريتيزم« يالنيز حقيقي ادبي معيارلاريني سوال آلتينا آلماقلا کيفايتلنمير، هم ده مدني کيمليييني هله ده فورمالاشديرماقدا اولان بير جمعيتده بير سيرا منفي نتيجهلر ده دوغورا بيلير. بئله کي بو فئنومئن، ادبي اثرلرين کئيفيتينين آشاغي دوشمهسينه، سطحيلييين ياييلماسينا، ادبي تنقيدين ضعيفلنمهسينه، مدني مصرفچيلييين آرتماسينا، استعدادلي قلم صاحيبلرينين کؤلگهده قالماسينا و داها چوخ شوو کاراکتئرلي اثرلرين تبليغ اولونماسينا و مطالعهنين، ادبي تدقيقين آزالماسينا مساعد شراييط يارادير.
بوتون بونلار ميللي مدنيت کيملييينه، ائلهجهده ادبي ياراديجيليغين گلهجهيينه اوزون مدتلي منفي تاثيرلر قويا بيلر. تاسف دوغوران اودور کي، بو پروسئس تکجه پوپوليار ادبيات ايشچيلريله محدودلاشمير و سون واقتلار بعضي حقيقي ادبيات نومايندهلريني ده سلبريتيزم داورانيشلارينا مئيل گؤسترمهيه يؤنلتمکدهدير...قارشيدا دوران دوشوندوروجو سوآل بودور: ادبياتيميزدا »سلبريتيزم« فئنومئني فرصتمي، يوخسا تهديد!؟
…!Arazazarbaijzn.anadilimiz@gmail.com
دستمزد بالا ميرود، قدرت خريد نه؛ روايت تورم از جيب کارگران
آموزش رايگان در عمل وجود ندارد
قطعات يک و دو آزاد راه اروميه-تبريز زيربار ترافيک مي رود
اروميه در آستانه نوروز ساماندهي ميشود
تأکید بر شتاببخشی پروژههای ریلی آذربایجانغربی در نشست استاندار با مدیرعامل راهآهن
تقدير حقيقي؛ رفع مشکلات معيشتي مردم است
حتي پزشکيان هم قدرت حذف رديفهاي بودجه خوار را ندارد
ايجاد منطقه آزاد مشترک بينالمللي بين ايران و ترکيه شتاب ميگيرد
هشدار! شوک ارزي دارو خطرناک خواهد بود
بازار لباس به سمت مدلزدگي رفته، نه پوشش
درباره آراز آذربایجان