آسلان عمي

گولومسونه‌رک، يئني آليشقان آلميسان، آسلان عمي؟! موبارک‌دير! دئديم.»يوخ، واريم ايدي. چوخدانکي‌دير،« دئدي.
»آخي من بونو گؤرمه‌ميشديم. يوخسا مخصوص موشتريلر اوچون‌دور؟!«»دئمک اولار!« دئييب دوداغي قاچدي.
گولومسونه‌رک، »دئيه‌سن بو ايشين ايچينده بير ايش وار!« دئديم.»يوخ،. . . هن!«
«منه دئ، آسلان عمي. هئچ کيمه دئمه‌ر‌م. آرتيق، بير ايل‌دير مني تانيييرسان. »اليمي آليشقاني آلماغا اوزاتديم، آنجاق اؤزو اونو يانديريب سيقارئتيمي آليشديردي.
هله سيقارئتيني چک، سنه آچيقلايارام. آنجاق اؤز آراميزدا قالسين، دئدي.»ياخشي! آرخايين اول،«دئييب، سيقارئتيمي چکمه‌يه باشلاديم.گولومسونه‌رک،»کئچَن بير ايلده سني يوخلاييرديم،« دئدي.»يوخلاييردين مي؟!« دئييب گؤزلرينه باخديم.
»هه ده. يئني گلَن هر بير موشتريمي يوخلاييرام«»نئجه يوخلاييرسان؟!«
»بير يئني گلَن موشتريلر وار، بير بَيه‌ندييم موشتريلر وار، بير ده بَيه‌نمه‌ديکلريم.«
»نئجه يعني؟!«هر يئني موشتري گلَنده، اونو بير مدت گؤز آلتيندا ساخلاييرام. داورانيشيني ايزله‌ييرم، دئييب منه باخدي.»چوخ ماراقلي‌دير! مسئله بير آز غليظلَشدي! سيقارئت ساتماغي ساده بير ايش سانيرديم.«
«بلکه ده باشقا سيقارئت ساتانلار اوچون ساده بير ايش‌دير، اما منيم اوچون بئله دئييل.ايندي بو آليشقانلارين فلسفه‌سي نه‌دير؟!آسلان عمي، کؤينه‌يي‌نين جيبيندن بير گيله سيقارئت گؤتوردو، دوداقلارينين سول طرفي‌نين آراسينا يئرلشديردي، سونرا قيرميزي آليشقاني يئشيکدن چيخارديب اونو آليشديردي. سيقارئتيني بير اودوملوق سوموروب، توستوسونو توستولوک بوروسوندان چيخان کيمي هاوايا پوفله‌دي. من ده سيقارئتيمه بير قوللاب ووروب، سيقارئتچي عمي‌نين پوفله‌دييي طرفه پوفله‌ديم. توستولر بيربيرينه قاريشدي. آسلان عمي گولومسوندو.هه، دئييرديم، بير مودتدن سونرا اخلاقيني، داورانيشيني بَيه‌نديييم موشتريلريمه سيقارئتي آليشديرماق اوچون بو قيرميزي آليشقاني وئريرم. يئني گلَن موشتريلريمه آغ، بَيه‌نمه‌ديييم موشتريلره ده ساري آليشقان وئريرم.
»ماراقلي‌دير! بو آليشقاني باشقا آليشقانلاردان آييران نه‌دير؟!«»بو، اوزون بير حئکايه!«يئشييين آرخاسيندان بير کتيل چيخارديب، منه دوغرو ايته‌له‌دي.
»اوتور! آياق اوسته يورولارسان.«آياق اوسته اونو دينله‌مک ايسته‌ديييمي دئمک ايسته‌ييرديم، آنجاق يوخلانيلديغيم مو‌دتين يئني بيتدييينه گؤره، دعوتيني گئري چئويرمکدن چکينديم.الينده‌کي سيقارئته سون قوللابي ووروب، اونون کؤتويونو کول‌قابي‌يا باسدي. من ده اونون آردينجا سيقارئتيمي کول‌قابي‌دا سؤندوردوم. کول‌قابيدا ايکي سيقارئت کؤتويو داها وار ايدي. بلکه مندن قاباق آيري بير قوناغي دا اولموشدو.
بو آرادا باشقا بير موشتري ده گلدي. ايکي گيله سيقارئت آلدي. باشيني ييرغالاياراق آسلان عمي‌يله سالاملاشدي، سونرا سيقارئتيني آسلان عمي‌نين وئردييي ساري آليشقانلا آليشديريب گئتدي. آسلان عمي اونون گئديشيني ايزله‌دي. آليشقان فلسفه‌سينه گؤره، آسلان عمي بو کيشيني بَيه‌نمه‌ميش اولمالي‌يدي، او اوزد‌ن اونا، ساري آليشقان وئرميشدي.
او کيشي اوزاقلاشاندان سونرا آسلان عمي اؤز-اؤزونه ميريلداندي. سونرا منه ساري دؤنوب اونون حاققيندا نه‌سه دئمک ايسته‌دي، آنجاق سؤزونو آغزيندان قايتاردي.»چوخ سيقارئت چکرسن؟!« دئييب منه باخدي.»يوخ، گونده ائله بير-ايکي گيله چکه‌ر‌م.«»هه، ياخشي‌دير.«»بير گون بوردا سنين يانيندا قالسام، محله‌ده کيمي بَيه‌نيب، کيمي بَيه‌نمه‌ديييني ياخشيجا اؤيرَنه‌ر‌م!« دئييب گولدوم.آسلان عمي ده منيمله بيرليکده گولمه‌يه باشلادي. گولمک سسيميزي ائشيدن يولدان کئچَن بير گنج قادين دؤنوب بيزه ساري باخدي.»ائوده بير چوخ آليشقانيم وار، ايللر بويو توپلاميشام. ائويم آليشقان موزئيينه بنزه‌يير!«
»نه گؤزل! اوندا گرَک بير گون سيزه گليب، آليشقانلاريني ياخيندان گؤرم.«»هه، گل. اوتوروب بير چاي دا ايچه‌ريک.«»اؤنجه چاي، آرديندان سيقارئت، سونرا يئنه ده چاي!«ايکيميز ده قاققيلتي‌يلا گولدوک.
»بس نئجه سيقارئت ساتان اولدون؟«»گنج ياشلاريمدان سيقارئت چکمه‌يه باشلاديم، مکتبي بيتيرديييم ايلد‌ن. عسگرليکدن سونرا ايشه گئتديم. بير شيرکتده ايشه باشلاديم، آلتايلا دا ائله اوردا تانيش اولدوم. چوخ ياخشي، جاناياخين بير اوغلان ايدي. بير اؤزل‌لييي وار ايدي، آيدا بير قيزا وورولوردو!« دئييب هيققيلدادي.
آسلان عمي سؤزلرينه آرا وئردي. يئشييي‌نين آلت قاتيندان چيخارتديغي کيچيک قومقومادان ايکي ايستَکان چاي سوزدو.
»شيرکت باتدي، بيزي ده ايشدن چاخارتديلار. ايشدن قووولدوقدان سونرا بير نئچه يئره گئتديم، اما ايشه گؤتورمه‌ديلر، يا دا گؤتوردولر، آنجاق بير مودتدن سونرا ايشي بَيه‌نمه‌ييب اؤزوم چيخديم.«ايستَکاني گؤتوروب بير قورتوم چاي ايچدي. »چايين سويوماسين،« دئييب ايچمه‌يه باشلادي.من ده چاييمي قورتوملاماغا باشلاديم، ايچينده قيزيل‌گول وار ايدي.
»آلتايين آتاسي کيچيک بير دوکاندا سيقارئت ساتيردي. آلتاي آخشام اوستولري گئديب دوکاندا قاليردي، من ده هردن اونون يانينا گئديرديم. سيقارئت ساتماغين يولونو دا ائله اوردا اؤيرَنديم. »»بس، آلتاي نه اولدو؟«
»آلتاي اونيوئرسيتئته گئتدي، من‌سه گيريش ايمتاحانيندان کئچه بيلمه‌ديم. ائله بو پئشه‌ده قالماغا قرار وئرديم.«آسلان عمي ايستَکانيني داغ سو ايله ياخالادي. يئشييين اؤنونده بير موتورسيکلئت داياندي. موتورسيکلئتچي ائنيب بير قوتو سيقارئت آلدي. قوتونو آچيب، بير گيله چيخارديب دوداقلارينين آراسينا تاخدي. آليشقان ايسته‌دي. آسلان عمي اونا آغ آليشقاني وئردي.کيشي سيقارئتيني آليشديريب، »ساغ اول، عمي،« دئييب موتورا مينيب اوزاقلاشدي.
آسلان عمي‌يه ماراقلا باخيب، اونون ايش فلسفه‌سيني ياخشي آنلاديغيمي بيلمک اوچون، »يئني بير موشتري! دوزدورمو؟!« دئيه سوروشدوم.»دوزدور. يئپ‌يئني بير موشتري! بيرينجي دفعه‌دير گؤرور‌م اونو،« دئيه‌رک گولدو. »باخ، سندن ياخشي شاگيرد چيخار، چوخ تئز اؤيرَ‌نيرسن!«»گرک گونده بير ساعات گليب بوردا سنين يانيندا قالام!«»هه، گل!«باشقا بير موشتري تلَسيک گلدي. بير گيله سيقارئت آلدي، پولو اؤد‌ه‌ييب، سيقارئتي آليشديرمادان چيخيب گئتدي. بو کيشي‌نين هانسي آليشقان قروپوندا يئرلشديريلديييني اؤيرَ‌نه بيلمه‌ديم. آسلان عمي ده بير شئي دئمه‌دي. آردي وار
Arazazarbaijzn.anadilimiz@gmail.com